任賢齊高唱兩個夠晒數
歌手任賢齊（小齊）昨日舉行新碟發布會，好友五月天帶埋師弟魔幻力量（MP）來港支持，對近日娛樂圈喜訊重重多位藝人懷「龍」胎，他感到相當驚訝，稱有兩個小朋友已經夠晒手忙腳亂，未有打算再造「龍種」。
唱片公司昨日斥資近百萬為小齊新碟《不信邪》舉行大型發布會，並宣布明年2月18至19日將踩入紅館舉行演唱會。以白馬王子造型現身的小齊在MP的伴奏下唱出新歌，而好兄弟五月天專程飛來香港為他站台，送上由李宗盛製造的結他，令小齊喜出望外。
身材好過五月天
小齊說：「今次好開心搵到五月天幫我做新碟監製同埋演唱會嘉賓，雖然今次超支三倍，製作費成七百幾萬，大家都好認真去做，單單一首歌都錄咗七個版本，但老闆都好支持我！」演唱會上，將會由MP為他的歌重新編曲，為歌迷帶來驚喜，他說：「我知自己做唔到郭富城，不過都會有少少簡單跳舞動作。（玩rock會唔會除衫？）五月天都有除衫咩？我唔使驚，我身材應該好過佢哋其中幾個。」
提到近日娛樂圈喜事重重，黎明太太樂基兒、楊千嬅等都被傳出懷有「龍B」的消息，早已為人父的小齊大感驚訝：「真定假呀？我自己做老竇，真係感受到新生命嗰種喜悅大過攞獎或者演唱會爆滿，成就感唔同。（你順便追個龍B？）唔使喇，多謝晒！依家兩個小朋友已經手忙腳亂，應該都夠喇。」
難忘當年低潮時
97年小齊憑《心太軟》大紅，大碟賣過百萬，風頭一時無兩，原來他也有低潮的時候：「我拍《神鵰俠侶》劇集時，有人將我同古天樂比較，鬧我『樣衰』，真係好hurt呀，我好驚我會有抑鬱症，所以保持平常心好重要。」他亦試過被相士批不會紅而失去工作機會，但是他決意「不信邪」，繼續演藝之路。
文：音樂組