陳嘉桓追殺陳浩民 放生馬德鐘
陳嘉桓於內地被陳浩民和馬德鐘攬啜事件又有新進展！身兼陳嘉桓經理人兼師傅的冼國林與樂易玲昨日開記者會，冼師傅表態接受馬德鐘解釋，但就不接受陳浩民道歉。據知冼師傅除日內會到內地報公安徹查外，並同時會在港入稟法院，循民事程序向陳浩民作出追究及索償。明顯咬實陳浩民，放生馬德鐘！
據知，陳嘉桓早前雖在港報警備案，但有關方面仍感到香港警方在司法管轄制度下只能作有限度調查，甚至未必有足夠證據對有關人士作出刑事指控，冼國林日內除到內地報公安，同時亦會入稟香港法院，對陳浩民作出侵害他人身體的指控。據知，香港警方將案件列為境外罪行，程序上亦會展開行動，有指下星期會邀陳浩民會面，不排除會套取一份口供。
未有觸及敏感部位
冼國林昨日聯同無綫高層樂易玲在港舉行記者招待會，吸引近百傳媒到場。樂易玲說：「好多謝前兩次同冼師傅傾談中達成共識，得到諒解和支持。馬德鐘頭先打畀我，要多謝冼師傅、陳嘉桓同佢嘅家人。」冼國林稱馬德鐘承認事件處理不恰當，沒有施予援手。他說：「我問過陳嘉桓，佢話馬德鐘當時有以安慰方式拉佢埋嚟，問佢有冇事，而佢手部冇觸及到陳嘉桓任何敏感部位。馬德鐘解釋當時飲咗酒唔識即時反應施援手，得饒人處且饒人，了解真相後唔會冤枉好人。」他更指馬德鐘主動道歉、無推卸責任、誠意比較好、從來無逃避、沒指陳嘉桓借意上位，在沒有貶低陳嘉桓為大前提下，故作出諒解和包容。
據知，冼師傅堅持咬實陳浩民唔放，導火線是陳浩民及其經理人在微博的回應內容顯出不承認過錯、推卸責任和語帶雙關，令他怒不可遏。問冼國林是否原諒陳浩民？他說：「佢做咗唔應該嘅事，明顯係嚴重行為，於法於理佢責無旁貸，道義上唔啱！（記者會佢感動唔到你？）諸多掩飾、指黑為白，連鞠躬幾多次都要寫埋出嚟，心裏都有答案！佢所謂道歉，一出事佢就唔誠懇，先話冇掂過陳嘉桓、再解釋自己『好客』、再推搪同推卸責任，又話要帶眼識人，又指有人借佢上位、人紅是非多等！完全睇唔到佢有咩誠意！我唔考慮佢所謂嘅道歉。」問早前備案是對哪一位作出控告？他說：「我哋只係講出事實，告邊個由律政司決定。我唔認為馬德鐘會被告。」
對於陳嘉桓當日在記招指「兩位前輩都變咗另一個人」，冼國林代為解釋：「一個俏皮突然變狼，一個謙謙君子為何不施予援手？從寄望變咗失望，所以佢咁講，因為佢兩個之前形象都唔係咁。」
後悔兜巴星鬧死蠢
冼國林自爆曾質問陳嘉桓為何多次與二人出入夜店，以致令人有機可乘，但陳嘉桓答不出。他說：「我有逐張相問佢，女仔同人熟都要保持距離，我『星』咗佢一巴仲話佢死蠢。我緊張錫佢先咁做，依家仲未向佢道歉。」有傳他們收到「收聲指令」，冼國林表示絕無此事。
提到陳嘉桓介入洪天明與周家蔚戀情，冼國林着傳媒不要再炒作。他又指已收到洪天明的道歉短訊：「佢係我世姪，洪金寶係我尊重嘅大哥。天明冇保護嘉桓，明知佢（陳浩民）個底係咁都冇提醒佢！為佢父親同自己着想，都要遠離豬朋狗友。」
馬太到內地陪丈夫
有傳馬德鐘與太太婚姻出現問題，樂易玲指馬太已到內地陪丈夫以示支持。冼國林寄語說：「佢太太出咗好多力，佢要珍惜眼前人和家人。」問到事件有否影響馬德鐘與無綫之間的關係，樂易玲說：「一件事還一件事，當務之急係解決呢件事。藝人唔喺香港都唔可以放鬆，要守望相助。酒可以飲，但唔可以醉。陳嘉桓為人好單純，希望佢快啲冇事投入工作。」
文：影視組