呂慧儀貪靚仔認嫁黃文迪
前日仍不肯透露未婚夫是誰的「長腳蟹」呂慧儀，昨日出席新劇拜神儀式時繼續被記者追問，她終透露下月十三日與前港男男友黃文迪（Dickson）結婚，於會展筵開二、三十席。問對方用甚麼方法感動她？她說：「主要嚟講係靚仔。（好膚淺喎！）佢都好細心，今次所有嘢佢安排，佢知我怕煩。」她指Dickson個多月前求婚，早前與他到東南亞一個小島拍結婚照。她又說：「其實好多嘢佢搞，佢淨係叫我話佢知要請邊個，我淨係出個人，佢同我屋企人夾晒，我係最遲知嗰個。」
另外，王浩信太太陳自瑤之前被指兩年前遭人三十萬包養，浩信笑言不實新聞不會影響新婚生活，更準備十二月到馬爾代夫度蜜月，浩信更謂：「我仲同佢講笑話兩年前我同佢拍拖，嗰陣係我包佢，又笑佢三十萬貴咗啲添。」
