G.E.M.踩「肥杏」樣衰：有怪莫怪
歌手G.E.M.（鄧紫棋）07年未入行前在網上寫的一個私人日記被公開，包括對前男友寫下的甜言蜜語，又鬧阿媽煩，更踩鄧麗欣唱歌「驚嚇」，彈吳卓羲跳舞核突，當中又提到「肥杏」，指她樣衰唔識做戲，令人聯想到她所指的是胡杏兒。
G.E.M.前晚得知網上日記被公開，相信是黑客所為，她說：「依家睇番覺得好白癡，我唔會唔夠膽面對，係細個粉絲心態去寫，冇諗過有人睇到。」將來見到鄧麗欣及胡杏兒可會尷尬？她說：「嗰時好細個，我都唔記得自己咁寫，希望佢哋有怪莫怪我唔識世界，如果係令到有人唔開心，我都想道歉。」入行後她見到身邊歌手藝人，為工作付出的努力，明白每件事不可單睇外表，想法已經完全不同。而鄧麗欣透過經理人回應：「佢都話唔記得，冇所謂啦，每個人都有自己喜好。」至於胡杏兒則至截稿前仍未有回覆。
