許冠英遺笑人間 好友感觸致祭

許冠英於本月8日被發現倒臥家中，後來證實死亡，家人昨日為他於沙田寶福山紀念館設靈，靈堂以白色布置為主，門口「許府治喪」的牌面旁邊、弔念冊的位置等都有放置阿英生前最愛的巨鷹裝飾，記者從罅隙中可見到阿英的遺照笑容可掬，用白玫瑰花包圍住，旁邊有個大銀幕播放住他生前的經典遺作，包括電影《花田囍事》、《雞同鴨講》、《合家歡》等，令人懷念。人緣甚廣的阿英獲不少圈中藝人送上花圈致哀，包括張學友伉儷、陳可辛伉儷、李克勤伉儷、古巨基、鄭少秋、黃百鳴等過百個花圈逼滿靈堂。

初戀情人出席儀式

兄長許冠文、許冠武及姪仔許懷欣、許懷谷都有全家人到場，但傳媒守候一整晚都未見Sam的出現，許冠文晚上會見傳媒，透露阿英的骨灰將會申請撒落西貢海面：「我哋三兄弟好鍾意去西貢釣魚同游水，依家咪餵番啲魚囉，（Sam唔嚟？）佢好早嚟好早走，成個喪禮大部分都係Sam計劃，係阿英唔守規矩，冇預佢咁早走，係都我行先啦！」他表示阿英一生無兒無女無老婆樂得清閒，當問到有傳她有位日本女友，許冠文說：「我冇見過，莫名其妙！」

許冠文向傳媒道謝，又透露將阿英的骨灰撒落西貢海面。	許懷欣與太太亦有到場致哀。	阿英的初戀情人孫寶玲專程來港出席儀式。

另外，高志森、錢小豪、莊思敏、廖碧兒、孫敬安夫婦及阿英的初戀女友孫寶玲等都有到場致哀，高志森表示：「佢去得好安詳，好似瞓覺咁，頭先靈堂入面個個都眼紅紅，我睇番佢播啲片都好大感觸！」而莊思敏大讚阿英提攜後輩又無架子，非常親切。

文：音樂組