馬德鐘風騷開工 無懼冼國林報公安

【姜裕橫店直擊】陳浩民與馬德鐘在橫店涉嫌醉酒攬錫陳嘉桓事件全城嘩然，備受千夫所指的陳浩民為挽形象，前日拉埋快將臨盆的太太蔣麗莎開懺悔記招，惜依然捱轟做戲；至於馬德鐘，日前亦發聲明強調清白，並找來無綫高層樂易玲介入調停。

縱然兩男出盡法寶求甩身，不過本報收到可靠消息，Rose師傅冼國林並未因此罷休，據知他下星期將正式在內地報公安，實行咬住唔放。本報就消息求證冼國林，他以公務繁忙為由拒絕回應。而冼國林昨午接受Now觀星台訪問時，明顯對陳浩民在記招上公開向他及Rose致歉無動於衷：「我無睇，亦唔想評論太多。睇番對白、前文後理都心裏有數。」對於有指樂易玲介入事件，冼國林直認有與對方見過，但卻拒絕透露會面內容，更扯開話題謂：「各位撫心自問如果發生喺你身上會點呢？（樂小姐幫馬德鐘解釋？）我唔係好方便講好抱歉。」

否認同洪天明撻着

他透露Rose現時情緒仍有不穩定，故已多派助手陪伴，並希望她盡快投入工作。談到有指Rose與洪天明秘密交往數月，冼國林直指報道對Rose欠公平：「唔係事實寫出嚟，好傷害女性。以我所知（Rose同天明）只係普通交往，無私人來往。」他又強調Rose當晚只飲可樂，沒有喝酒。另記者昨日致電警察公共關係科了解Rose報案後進展，發言人指警方會繼續跟進、了解及處理事件，暫時未有拘捕任何人。

而繼續在橫店拍攝《笑功震武林》的陳嘉桓，雖然有指她昨日會繼續開工，但晨早七時已抵達酒店的記者，卻由始至終不見她出入；直到下午接近四時，三名工作人員將陳嘉桓的行李搬上貨車，惹來Rose想另找棲身酒店避開傳媒追訪的揣測。

埋位前的馬德鐘風騷地整理頭髮和工作人員傾個不停。	放大圖片	陳嘉桓已遷離酒店，避免與陳浩民和馬德鐘有碰面機會。

傳媒追問不作回應

至於前日揚言已離開橫店的馬德鐘，昨日卻離奇現身橫店，縱然盛傳他因事件婚姻現危機，不過他步出酒店時卻神態自若，全然未受傳聞影響心情；面對蜂擁而上的傳媒追問「有冇見過陳嘉桓？」、「會否返香港開記招？」、「有傳太太要離婚」及有否留意陳浩民開記招等問題，馬德鐘未有停下腳步，只淡淡回應謂：「吓？我冇嘢要回應。」笑看風雲的馬德鐘，抵達廣州街開工時繼續心情靚爆，只見他無論與導演研究劇本、化妝及出入嘴角都不期然掀起，等候埋位期間，又不時風騷整理頭髮，與陳浩民前日痛心疾首的喊爆懺悔表現形成強烈對比。