張家輝心痛嘉桓受辱爆粗喊打
陳嘉桓（Rose）慘遭侮辱，同行兼家有愛女的張家輝與任達華都看不過眼！向來斯文的家輝說到激動時竟禁不住爆粗鬧：「如果有人咁對我個女，我會打X死佢囉！」
Rose被陳浩民及馬德鐘侮辱事件熱爆娛圈，身為金像影帝的家輝忽然化身「娛圈判官」，昨午接受電話訪問時不禁謂：「我同我太太都係演員，同時亦身為一女之父，如果件事係真嘅，我支持交由警方處理囉。試想吓如果你係佢（Rose）屋企人，相信一定好傷心。（如果有人咁對你個女，你有咩反應？）我會打X死佢囉！飲醉酒都要為自己嘅行為負責任嘅！」
任達華嘆飲酒累事
家輝坦言與三人不熟，但覺得Rose只不過是細路女，加上孤身在異鄉工作，身為前輩的男藝員理應多加照顧。有指在橫店工作生活苦悶、消遣不多，男藝人很容易「犯錯」，家輝絕不認同：「我都去過嗰度拍嘢，犯唔犯錯睇人囉，記得要話畀大家聽娛樂圈其實唔係咁架！」
身在海南島的任達華得悉Rose被欺凌，即衝口而出謂：「咁衰格？如果真嘅，要好好反省一下，都話飲酒累事架啦！馬騮仔（指陳浩民）嘅金剛棒敵唔過詠春拳嘅，叫師兄（杜宇航）飲番幾杯，同佢較量吓啦。」他更敦促兩男要向女方鄭重公開道歉。而鍾嘉欣昨出席公開活動，她希望Rose盡快平復情緒：「我都有返過內地拍戲，不過次次有慶功宴，翌日我都要開早，所以冇試過留好耐玩到癲晒，況且我酒量唔好，亦冇人試過逼我飲。」
麥包質疑無人阻止
至於與陳浩民私交甚篤的麥長青則堅信好友人格，麥包說﹕「唔明點解啲相咁近距離畀人影到！現場又有咁多人，如果真係發生咁嘅事，都會有人阻止啦。（勸陳浩民飲少啲？）佢已經少飲咗，上次同佢食飯直情冇飲添！」
文﹕影視組