莊思敏貪有feel冒險閃婚 周家蔚準備B計劃
莊思敏今期邀請快披嫁衣的好友周家蔚大談女人經，周家蔚自爆小時已夢想成為賢妻良母，現在反而事業先行，但亦Ready同洪天明生BB，至於感情遇挫折，向來重視事業的莊思敏不諱言會閃婚。
莊：莊思敏 周：周家蔚
莊：恭喜你，就快成為洪太。
周：我想講，個婚禮延咗期。因為男主角（洪天明）同佢爹哋（洪金寶）都太忙，原定係11月11日，但依家變咗無了期，可能要搵佢嘅經理人度期，哈哈﹗天明問我想搵錢定係點﹖我都覺得搵錢重要啲，之前定嘅婚期都無乜特別意思。而且我哋乜都未訂，所以改期都無所謂。
莊：做嘢係啱，最緊要搵錢，男人要搵錢，女人都要。
周：我依家都開緊劇，會拍到12月頭。
莊：你點解會結婚﹖
周：我細個嘅夢想就係做家庭主婦，因為我好鍾意做家務，以前讀書已經係我負責打理屋企。之前天明話婚後請個賓妹，我都話唔使，啲人話我蠢。
莊：我就最唔鍾意做家務。結婚對我嚟講唔係好重要，唔會逼自己一定要結婚，不過，我可能會閃婚，遇到啱就即時結。
周：如果遇到啱就要結，否則好浪費時間。結婚其實係一種投資。
莊：有啲人就會覺得好冒險。
周：所以要搵個條件好啲，口碑好重要，觀察佢嘅家人同朋友。
莊：不過有時口碑好好，無感覺都係唔得。我希望搵到個好了解我諗法，溝通到，又體諒我嘅人。
拍拖半年兒戲訂婚
周：無論任何事都要尊重我，有時我會想工作先過愛情。以前我想做個賢妻良母，會揀愛情行先，但依家大個咗，會想要事業，因為係保障。雖然我外表睇落唔似。
莊：咁婚後會唔會即刻生小朋友﹖
周：我會生，我係Ready生，但天明係個好有計劃嘅人，佢要一步一步，要先買樓，再結婚，婚後兩年先生小朋友。其實我同佢拍拖半年已經訂婚，當時佢有話三年後結婚，到今年就三年，所以佢一定要今年結婚。當時訂婚，我唔係好認真，因為太快，諗住畀大家時間觀察吓，睇吓可唔可以維持到咁耐。
莊：睇唔出天明係一個咁有計劃嘅人。不過我知道佢信咗主之後有好大改變，成個人唔同咗。
周：有時食飯佢會反過嚟提醒我要祈禱。有次平安夜我帶佢返教會，佢走出去決志，我好開心佢咁做。唔係我有咁大Power令佢改變，而係一個Timing，加上佢個人又成熟咗。
莊：佢畀我感覺係唔會咁快定性，真係無諗過會咁快結婚。
周：我都覺得佢仲好年輕，呢段又係搏殺時期，我唔係好Aggressive嘅人，但都鍾意做嘢。不過我同佢已經好老夫老妻，我之前去加拿大，可以同佢幾日唔打電話唔SMS。
莊：你哋真係好屋企人Feel。我就唔得，我之前拍拖五年，都要Keep住每日打電話。
周：過咗好甜蜜嘅時期。之前佢去哈爾濱拍戲，啲人話哈爾濱好多靚女，我都只係問佢一句，啲女仔靚唔靚﹖白唔白﹖滑唔滑﹖佢話見唔到，最多去超市買嘢食。講完我就好放心。
莊：係呀﹗佢開工時真係好定，好似自閉仔咁。
想做奸角怕畀人鬧
周：講開工作，你好似樣樣都做，咁最鍾意做乜﹖
莊：我好貪心，樣樣都鍾意，因為性質唔同。做活動行騷係最易，做主持挑戰大，拍戲又無咁悶，氣氛好好，我係未試過拍電視劇。
周：係咪因為你太高﹖你高定係呂慧儀高呀﹖
莊：唔一定要有感情線，我同呂慧儀差不多高，佢都搵到男仔拍檔啦﹗陳敏之都好高啦，咪又得。
周：我都係乜都鍾意做。依家慢慢鍾意拍劇。以前有個監製問我鍾唔鍾意拍劇，我話唔知，因為未試過就話鍾意，好似唔合理，個監製最後無搵我。啲人話我有乜理由咁答人。
莊：我覺得拍電視劇好難，拍電影就易好多，幾句對白就一個Shot，每次只係背幾句。
周：係呀﹗電視有時一場戲成四五頁紙，好似法庭戲咁，唔止對白，就連走位都要記得好清楚。
莊：所以電視台好似木人巷咁，真係好大挑戰。
周：我之前本來可以做奸角，幾開心，但後來轉咗。我想試吓做奸，可以有幾乞人憎，做好人始終發揮有限，奸角可以好盡，不過我又唔想做開奸角就一直做奸，唔想出街畀人鬧。我好欣賞佘詩曼同章子怡，覺得佢哋做戲好好。
莊：我就鍾意張曼玉，有型又有氣質，佢初期同後期嘅演出差好遠，簡直好似開咗竅咁。希望我哋一齊努力，愈做愈好。
文：陳嘉敏 攝：吳文聰
服裝及場地：Aboutique