陳柏宇開騷 女友「乞求」見家長
陳柏宇（Jason）與周柏豪前晚變身「雙柏」組合齊齊開騷，Jason女友符曉薇（Leanne）大方現身捧場，Jason出動苦練一年的結他，自彈自唱冧女友，更於台上公開感激對方支持，騷後Jason透露公公婆婆由加拿大回港欣賞，坐在兩老身旁的Leanne首次「見家長」，心情比他開騷還要緊張：「佢淨係見過舅父，因為媽咪喺外國。（認定佢？）幾時拍拖都係認真！」，而Leanne於微博笑言向男友「乞求」才有機會撐場。
周柏豪嫌豪乳重口味
騷上，老友鬼鬼的「雙柏」拿起結他互「唱」，Jason被柏豪翻舊帳笑指曾於演出時疑似有生理反應，即以對方緋聞多反擊，騷上兩人更情深對望又示愛，如婚禮般播出成長片段及「冧爆」合照，場面搞笑。
適逢昨日為柏豪生日，大會特別為他準備「豪乳」蛋糕提早慶生，而籃球隊橫洲工業隊友則送上「球場」助興，問到眾人是否迎合柏豪喜好送上「豪乳」？他說：「適中得喇，頭先嗰個太大，太重口味。」柏豪表示會與隊友食飯慶祝，至於緋聞女友吳雨霏？他說：「朋友呢啲遲啲先，佢冇主動約我，之前佢開騷本來想捧場，但要準備呢個騷冇去。」
文：音樂組