Hidy引「老翻周杰倫」追住示愛

陳啟泰、甄詠珊及o靚模余曉彤（Hidy）、徐熙素（Hazel）等，昨日到亞視出席香港首個男女速配節目《撻著》開鏡儀式，首集有逾百名女士到場「揀仔」，年齡由十多歲至五十多歲，學歷高至雙碩士，單身人士即可參加，入圍的兩名男士要出招引女「點燈」，難道不怕有人意圖不良？亞視表示已作篩選，參賽者要繳交真實個人資料。

感覺刺激面都紅

已有男友的Hidy照上節目揀仔，她笑言感覺刺激：「一日未結婚都仲可以揀，我都有叫佢嚟玩架！」提到心儀男士類型，她直言要肌肉勁、運動勁，總之樣樣勁，故會要求男參賽者剝衫。其中貌似周杰倫的「求偶者」是歌手陳日豐，他說09年與Hidy合作拍MV後，便一直對她念念不忘，故專程來追求Hidy並作定歌示愛，Hidy聞言面紅紅大為靦覥，她承認當年二人拍MV時表現親暱得激嬲男友，其後有保持聯絡。

「老翻周杰倫」陳日豐追到貼，揚言作定歌向Hidy示愛。

甄詠珊（左）身為主持想乘機揀番個筍盤，旁為陳啟泰及Hazel。

對於Hidy愛肌男，陳日豐口窒窒說：「練緊架喇！」Hidy即識做地說也喜歡男士有音樂才華。

提到有工程師涉帶四名o靚模上門非禮，曾拍私影的Hidy奉勸少女小心，若與攝影師不熟，千萬別上人屋企，最好帶朋友同行，有咩事可以打過！

甄詠珊落足眼力

而主持甄詠珊是內地速配節目的捧場者，最感動是男女參賽者互相揀中，身旁的陳啟泰即諷刺內地節目「造假」，指亞視節目才是「貨真價實」，甄詠珊在後台見到男參賽者耍雙節棍及有催眠師，也希望從中找到筍盤。

文：影視組