嘉穎寸保怡可以唔玩

鄭嘉穎前晚現身活動，對於躋身視帝十五強，他表示要感謝同事支持及投票，並笑言：「英雄所見略同！（有冇信心？）依家人哋對我有信心，如果我自己都冇，就對唔住支持者，所以愈來愈有信心。希望到時（頒獎禮）會有好結果，但時間尚早，仲係好初步。」

林保怡對於被踢出視帝名單坦言冇所謂。	嘉穎在活動中忙為fans簽名。	黎耀祥及鄧萃雯去年未續約一樣贏得帝后。

睇好祥仔天華

在芸芸視準視帝名單中，嘉穎已有心水，他說：「黎耀祥同謝天華啦，兩個今年都有機會。」他又認為既然參加了頒獎禮，就要盡努力，多做宣傳，他說：「睇民意決定，民意好緊要，係Backup，冇民意就冇意思。」問到睇好誰奪視后？嘉穎表示：「非常睇好胡杏兒，呢幾年佢好突出，尤其今年，收視好嘅劇集佢都有份，另一個就係陳法拉，佢角色都好受認同。」

有傳和TVB續約會令奪獎勝算提升，他就力撐公司夠公平：「唔應該混為一談，呢兩年祥仔同鄧萃雯都有獎就證明唔係，公司唔會咁做，分得開。」對於林保怡早前數TVB「世界好細」，嘉穎意有所指說：「每個遊戲都有規則，你可以選擇參與同唔參與，係自己選擇！」

馬浚偉唔心動

另一邊廂，林保怡前晚現身手機活動，對於被踢出視帝名單，他坦言：「冇所謂，我又唔係冇做過視帝，亞洲視帝都做過啦。（將來再合作？）有好劇本就會。雖然依家冇約，但冇TVB就冇我，同埋我係TVB親生仔好耐啦！轉吓環境都好正常。（出席台慶？）去嚟做咩？冇人邀請我。」保怡又否認早前因不滿而炮轟TVB，指是言語誤會。另外，同樣榜上有名的馬浚偉就表明一定會改變跟TVB的合作方式，故有份提名視帝亦不心動，還直言今年出席台慶的機會甚微。

文：名人組