倉田保昭設館授徒 蝕錢唔拘
日籍武打影星倉田保昭因拍戲與成龍、洪金寶等私交甚篤，彼此於大銀幕上不時切磋武藝。年屆六十餘的他最近更決意將自己鑽研的空手道引入香港開班授徒，明知蝕錢亦要圓夢想！
先後參演過《東方禿鷹》、《夕陽天使》及《新宿事件》等大片的倉田，早已視香港為第二個家。他除說得一口流利廣東話外，近日更於銅鑼灣區自資開設武館。他直言：「呢度租金真係好貴，所以相信都會蝕錢，你幫吓手多多宣傳。」足以證明倉田對武術的醉心程度。他揚言永不言休，堅持每年拍一部戲，更不怕忌諱打趣說：「拍戲拍到死都滿足﹗」
活得自在最重要
倉田來港發展，除因鍾情本地美食叉燒包外，還深受311日本大地震所影響。他說：「當時我拍緊戲，後來發現天災後遺症愈嚟愈大，我覺得做人都係簡單啲好，最緊要係發揮到武術精神。以前我鍾意名車，依家發現我其實坐喺車裏面，再靚嘅外殼自己都睇唔到啦！」天災後，他選擇讓自己活得自在：「如果唔係喺東京養咗狗仔，我諗我直情會移民嚟香港添！」
盲拳打死老師傅
以往與成龍因對打節拍不對眼，結果一個鏡頭狂take六十多次，打到培養出彼此默契。但他最難忘是被莫文蔚「盲拳打死老師傅」﹕「同佢拍《夕陽天使》時對打，我一時不慎打中佢，佢痛到喊咗出嚟。但換轉佢出盡力打我，佢更加唔識得借位，結果十居其九都敲中我，我真係痛得要命！但冇辦法，哈哈！」他與周潤發合作多年，發哥人前人後都會介紹他為前輩，難怪倉田提起發哥讚口不絕，形容對方是最有禮貌的巨星。
文：影視組