李潤庭筵開20席 月尾娶空姐
有線娛樂台主播李潤庭（Eric）與拍拖五年的女友（Crystal）將於月尾共諧連理，於酒店筵開二十餘席，讓一眾親朋見証這重要時刻。談到未來太太，Eric讚口不絕，揚言對方在自己心目中分數「超標」，幸福之情羨煞旁人。
Eric年前坐長途機期間，邂逅任職空姐的未來太太，展開長達五年的「空中情緣」，最近決定攜手展開人生新一頁。外表酷爆的Eric求婚期間，絞盡腦汁為對方製造驚喜﹕「本來諗住買張機票，搭番我識佢嗰班機，然後跪地求婚，但因為工作關係時間方面配合唔嚟，惟有退而求其次。嗰朝我一大清早入機場接佢機，點知中途佢打嚟，言談間似乎已經識穿咗我有『詭計』。」
全靠老婆補不足
能夠贏得美人歸，Eric對婚禮的一點一滴亦花盡心思，由於未來李太最終因事未能租用心儀的婚紗，令她耿耿於懷，Eric承諾會另作「補償」，愛妻之情宣之於口，且不怕骨痹謂﹕「帶得佢返屋企，梗係要錫佢啦。（畀幾多分老婆？）滿分有找啦，佢心地好、EQ高，剛好彌補我嘅『躁底』。其實做得我哋呢行，返屋企真係會唔多想講嘢，但佢令我有無窮無盡嘅話題，每日都好開心。」
馬爾代夫度蜜月
舉家已移民加拿大的Eric，婚宴上當然會宴請「街坊」李琳琳及李影等。原先一對新人支持環保，打算從菜單上刪去食翅一環，但最終因要尊重老人家意願「屈服」，他謂：「希望喺其他方面唔好搞咁多嘢，補番條數囉。」至於蜜月之旅，一對新人打算明年起行到馬爾代夫享受陽光與海灘，再到日本瘋狂shopping。
文﹕影視組