連詩雅學做賢妻 煮出驚喜
歌手連詩雅（Shiga）日前與歌迷學整曲奇，身為獨女的她落手落腳以行動否認是千金小姐，並透露為成為一個賢妻良母，近年已開始入廚，最拿手是煎牛扒，自稱未有男友的她，只能給母親品嘗佳餚。
薛凱琪師妹連詩雅（Shiga）日前與兩女一男歌迷到餅店學整餅，由分配麵粉到放入焗爐全程一腳踢，雖然現場有男導師，但Shiga卻親力親為，還出手幫歌迷「發蛋」，由於Shiga是獨女，被記者笑她手勢有板有眼，Shiga即笑說：「我唔係千金小姐嚟o架，好多時都會幫媽咪做家務。」
向母親偷師
Shiga透露近年愛上入廚：「有時間會同媽咪去街市買餸，之後會睇住媽咪點煮，偷吓師。（想做賢妻良母？）當然啦，好多人都試過我手勢。（男朋友？）都未有男朋友，只係公司同事同媽咪咋。」Shiga坦言入行後沒收過男士送的花，更扁嘴表示只收過歌迷送的花。
問她有甚麼拿手小菜時，Shiga說：「煎牛扒同炒飯，曾經去美國做嘢，我試過一個人煮成組工作人員嘅飯，佢哋食完都話出乎意料之外。（指難食？）唔係呀，係估我唔到煮得咁好。（客氣說話？）希望唔係啦。」單身的Shiga坦言希望有機會為男朋友下廚。
採訪：音樂組