吳若希最怕猥褻目光
女歌手吳若希（Jinny）以修長美腿及甜姐兒面孔，成為宅男殺手，更被網友指她貌似日本AV女優，Jinny直言她不能控制網上留言，又表示十分懼怕猥褻眼神﹗
出道年多的青春女歌手吳若希，白滑玉腿是其個人標誌，她表示一直有做護腿保養，她說：「平時會搽按摩膏，同埋鍊吓隻腳，一得閒都會走去跑步。」
身邊多追求者
對於被網友指她貌似日本AV女優，Jinny靦覥說：「盡量唔知，網上講嘅嘢控制唔到，但面對面同我講呢啲話題，就更加唔好，我好驚啲男人以猥褻眼神望我，我會好唔自然。」
談及感情狀況，Jinny表示身邊有追求者，她笑稱：「實有人追，我話冇人追，一係我好唔掂，一係講大話，而追我嘅男仔咁啱好多係天蠍座。（有冇啱心水？）未知，我鍾意運動型男生。」問到是否「閃婚派」？她說：「唔會，同埋我唔想同圈中人拍拖。」
同許廷鏗即興
最近Jinny與「巨聲幫」的許廷鏗合唱新歌《知己》，外界反應不俗，她說：「錄呢首歌之前，我哋冇特別傾過點唱，反而去到錄音室先即興商量，出嚟效果OK。（擦出愛火？）冇呀，我哋通常係工作見面，私下比較少聯絡。」雖說Jinny是樂壇新人，但她較許廷鏗早出碟，她笑稱：「出碟我係佢師姐，但講出道佢係師兄，佢經驗多過我。」
採訪：戶冊平 攝影：黃叔榮 髮型：Nick@O4