梁漢文自爆婚前抑鬱
在樂壇打滾了廿年的梁漢文，經歷過人生高低、事業起跌，充斥了很多回憶片段，自爆情緒曾經出現問題，幸懂得自我檢討，找回人生目標方向，堅持不放棄努力做好證明歌手的生存價值。
為紀念入行廿周年，梁漢文（Edmond）將於明年一月再踏紅館舉行演唱會，希望今次為觀眾帶來不同的印象，演唱會海報上爆衫露腹肌的Edmond顛覆了過往的文靜形象，難怪他笑說：「都幾wild（狂野）！」
Edmond直言很期待演唱會的來臨，好恨出台前那種緊張、興奮的心情，他笑說：「我哋都算身經百戰，但之前同楊千嬅、陳奕迅做華星三寶個騷，出台前我同千嬅都好緊張，難得做咗咁多年，個心依然仲跳得咁快。」
優點識檢討
眨眼已入行廿年的Edmond經歷過開心起跌，由17歲參加新秀時的「死o靚仔」，到今日已成家立室，確實有很多回憶片段，他自爆在結婚前兩年情緒曾經出現問題：「平日開朗鍾意見朋友，但突然間變得收埋自己，最好朋友都唔想見，諗嘅嘢好負面，我開始知自己有問題，做歌手好易有種無形壓力，好彩我有少少優點，識去檢討自己，去調校番自己情緒，找回方向。」
作為歌手，Edmond有自己目標，覺得每年最少要有一首代表作，去維繫歌手生存價值，雖然近年香港唱片業每況愈下，但他沒想過放棄：「大家有冇諗清楚，係咪做得唔夠人哋好？我知好多人都冇再出碟，但我堅持繼續出廣東碟，當然有我原因，每次我都花盡腦汁去諗，但點解要咁辛苦，如果個個都唔去諗唔去做，香港樂壇就真係冇o架啦！」
文：音樂組 攝：司徒國榮
Hair：Moe@Salon MM Mastermind
Makeup：Hetty