開心果鼓勵後輩
許冠英離世消息來得突然，向來於娛圈朋友甚多的他，昨日獲各界好友從不同的途徑留言悼念，一起緬懷這位諧星。
廖碧兒昨日出席活動當場灑淚說：「係懷欣同懷谷（Sam兒子）話呢個消息畀我知，我當佢係Uncle，佢屋企人好錫我，我第一次同Sam合作之後就一直有保持聯絡，Uncle係一個開心果，佢嘅時裝都好正，好記得佢嘅皮褸。」
朱咪咪：「我哋07年首次合作，效果好好，因為阿英好怕醜，我就口不擇言，所以我哋好受歡迎。跟住我08年開演唱會都有搵阿英做嘉賓，佢喺後台感激我畀機會佢唱歌，搞到我好尷尬，話晒佢輩份高過我。」
黃百鳴：「收到消息感到好惋惜，我同佢合作過《花田囍事》，我叫佢做許冠傑阿媽嘅角色。許冠英好鍾意唱歌，我同佢唱K都會爭咪。佢為人唔計較、好友善又好人。（佢有三大遺憾，無妻、無子和無獎？）咁好多人都有呢啲遺憾。」
鍾慧冰昨日在微博留言悼念許冠英，她寫道：「腦海中立即呈現出那年，深夜在西貢山頭，我們圍坐着聽英哥講鬼故事的情景……謝謝你帶給我們所有的歡樂，一路好走。」
林建明跟許冠英同是邵氏訓練班同學，她說：「許冠英經常用鷹代表自己，成為典型標誌。」
陳小春在電影《鬼馬狂想曲》飾演「雞泡」扮許冠英，現身在揚州工作的他聽聞對方逝世表示難過，他透露有時在內地登台都會與對方碰面，但因為各有各忙，很少聯絡。
鍾鎮濤：「許冠英走了，曾幾何時我們一起打band講音樂，作鐵騎士打扮，很多畫面都重現在我腦海。」
鄭欣宜：「我細個見過佢，佢全家人都好有天分，我覺得好可惜，我有睇過佢哋嘅作品，好好笑！」
李蘊：「嗰時組合Cream喺04、05年有幫過許冠傑演唱會做嘉賓，日日都會見到英哥，佢好主動同人傾偈，成日叫我哋加油。」