琦琦：着史上最貴晚裝

夢想可以成真，不少有心人為挑戰自己而締造令人嘖嘖稱奇的健力士紀錄，做出從未有人做過的創舉。楊采妮想為自己打造的一個紀錄，就是有一天在零器材輔助下自由自在滿天飛；而愛靚的名模琦琦，在天橋上示範過不少大牌子時裝，但她最想造出的紀錄，是演繹一件史上最靚及最貴的晚裝！

琦琦「行咗咁多年騷，我想着一條全世界最靚同埋最貴嘅晚裝裙，條裙仲要係拖地，鑲咗好多名貴寶石及珠寶，總之係價值連城啦。」

楊采妮幻想飛上天「我好想有日可以唔靠任何器材輔助下飛上天，因為之前睇過報道，有個潛水員學瑜伽學閉氣好多年，有次佢可以唔使氧氣樽，潛入海底接觸大白鯨。我覺得人嘅力量係好犀利，只要有意志力，相信可以做出好多創舉。」

Jocelyn十日冇食嘢「我嘅個人紀錄相信係十日冇食過嘢，嗰陣為咗身體排毒，每日只飲果汁同食維他命，結果連續十日冇食嘢嘅感覺係好肚餓，好掛住啲食物！」

張舒雅西多食到滯「我嘅紀錄同食有關，細個一直未食過西多士，有年春節朋友仔嚟我屋企拜年，佢教我整西多士，我覺得好好味，一次過食咗六件，食到滯咗！」

張家輝兩日大昏迷「我想以瞓覺嚟創紀錄，我試過瞓覺瞓足兩日咁長，期間只醒過就是去廁所，去完再瞓過，完全冇食嘢，滴水不沾，屋企人仲以為我昏迷咗！」

梁漢文情迷泡泡膠「我有個癖好係鍾意玩泡泡膠！有次搬屋見到好多，我就坐低啪啲泡泡，結果啪咗成個幾鐘，我仲要係逐粒啪，唔會一次過啪幾粒，我想喺玩泡泡膠創紀錄。」

姚予晴狂擦大閘蟹「喺食方面創過紀錄，就係食大閘蟹，我曾經試過一口氣食咗十二隻，後來因為擔心膽固醇過高，同埋年紀大咗，依家真係未必做到。」