文恩澄熟客變老闆「寵」愛有加
歌手文恩澄（Rannes）對小動物甚有愛心，家裏除了飼養四隻狗、一隻貓、一隻兔外，更於銅鑼灣開設寵物Cafe，店內亦育有六隻可愛小狗。化身老闆娘的Rannes說：「佢哋全部都係領養返嚟。當中有兩隻係因為情侶分開，佢哋嘅『爸爸』『媽媽』唔要，聽到嘅時候真係好心痛亦好嬲！電視都成日叫人停一停、諗一諗啦！開心嘅時候就當仔女咁錫，分開之後竟然可以話唔要就唔要，唔通啲人離婚之後又掉啲仔女去孤兒院咩？」
帶給小朋友歡樂
提到開舖起源，Rannes說：「呢度係頂手返嚟，都做咗年半。原本我係呢度熟客，因為上手老闆夫妻一腳踢，覺得好困身，所以唔做。自己平日喺度hea嘅時候見到好多人帶狗狗嚟玩，有啲小朋友可能居住環境唔可以養狗，但嚟到呢度就可以同啲狗狗玩，自己好想延續佢哋嗰種歡樂同笑容。」
Rannes笑言經營最困難竟是一班「小朋友」（狗仔）：「佢哋雖然可以話係舖頭嘅賣點，但對於我嚟講係一條生命嘅責任比較大，佢哋唔係貨物，有感情，同時亦會生老病死。」
唔同性格不易打理
現時Cafe內有六隻「狗狗公關」，分別為德國牧羊犬Fiona、比熊Genki，另外還有四隻可愛的玩具貴婦狗甘甘、Lala、Burrito及Lemon。Rannes表示雖然品種不同，但飼養上不會帶來太大問題。她說：「如果話困難，其實狗狗嘅體積同性格唔同比較大問題。可能Lemon以前有啲唔開心嘅過去，唔係好信人，容易對人有戒心，都花咗好多時間去照顧佢。」
場地：DOGside Cafe
服裝：QOD