官恩娜黃貫中寸樂壇乜都假

互相欣賞笠高帽

P：Paul　

E：Ella

黃貫中很欣賞官恩娜對音樂的熱誠。	Beyond四子當年紅極一時，但官恩娜獨愛黃貫中。	官恩娜認為若同時兼顧歌影視發展，不能唱出好歌。

P：Ella你記唔記得，好耐之前我曾經幫你作過一首歌？

E：梗係記得啦！你肯幫我作歌，我真係好開心。其實我係你狂迷，唔係講大話，只係識咗你之後先收斂咗。我好細個就鍾意你，喺Beyond四個人中，我淨係鍾意你，覺得你好有型，你唔好尷尬呀。

P：我唔會尷尬，不過當你講大話啫！哈哈……

E：喺我音樂歷程中，有好多開心事，我歌唱生涯第一首歌就係你作曲，叫做《可以幾愛》。

P：係喎，我仲係第一個人交歌添。

E：我真係發夢都冇諗過，你係我一個好欣賞嘅偶像。當老闆同我講，搵咗阿Paul幫我作歌，我嗰時仲問：「邊個阿Paul呀？」知道係黃貫中時，我簡直唔敢置信！老闆仲話你會嚟睇吓我唱成點，我真係緊張到呢。講個笑話你聽，嗰次第一次見面，你叫我先數拍子，就係因為太緊張，連錄音時都數緊拍子，係你叫我唔使再數拍子，我先至識停。

P：哈哈哈！我有少少印象。不過你真係好勤力，聽到你不停咁唱，係唱到停唔到嗰種，你已經唱得好好，我同你經理人都係咁講。

E：其實我係隻牛。

P：你好有天分，嗰時我都話你唱得，唔似依家啲人先嚟讚你咁馬後炮。我都好開心，可以同咁勁嘅人合作。

E：多謝，多謝。

P：我遇過太多唔努力、冇實力嘅歌手喇！有啲經理人就係知有auto tune呢樣嘢，當個歌手唱咗十次、二十次都係唔得，就會有好多藉口，話好趕呀、今晚又有嘢做、啲感情已經唱晒出嚟呀！唔可以再唱時，就叫我幫吓手，幫佢哋tune番啱啲音、拍子，甚至咬字，連懶音都執埋。嗰啲愈紅愈大牌就愈係咁，係大爺嚟o架！

科技發達變依賴

E：依家科技真係好先進，但我唔知懶音都可以tune喎？

P：好似個「佢」字，冇咗個K音，我就將個「加」字嘅K聲key落去，好變態㗎！你又知唔知依家連live都可以tune？

E：咁邊個睇住個「芒」呀？

P：有部電腦好強勁，可以同步做到呢樣嘢，不過香港就冇呢部機。但我知外國好多人都係咁樣做緊。

E：我就唔得囉，都冇晒啲真實感。

P：呢件事簡直係荒謬之極，呢種叫做「假唱」，香港近呢十幾年都咁做。依家好興MMO（伴唱）外仲加多一條線，你畀MMO佢，佢就畀MMM（播帶）你，呢啲叫半MMO。好處係唱歌時唔使咁用力，但把聲會實啲。邊跳邊唱時，唔會有抖氣聲，只係會細聲少少。香港好多歌手都係咁。

E：總會有啲位，就算配音都唔會咁準啦！有時行內人聽到都會攞嚟笑吓。我見過有啲歌手唱歌個嘴冇郁但有聲，好似半M咁。

P：我唔介意歌手走音囉！你睇吓Macy Gray（美國黑人女歌手），佢唱live走音走到亂晒龍，但我介意啲歌手「假唱」囉！

E：我入行七年，真係未唱過MMO，因為我真係好鍾意唱歌。我喺屋企廁所、廚房都唱。如果上台唔畀我真唱，咪影響咗我嘅興趣？

P：Good！大家各有各做法。我講嘅唔代表係真理，但平時唱卡拉OK都真唱啦！早幾年內地已有條例唔畀歌手假唱。我買飛入嚟睇，你畀啲咁嘅嘢我，可以去消委會告佢啦！

E：不過我覺得依家好多歌手都唱得好好，好似陳奕迅、陳柏宇、小肥咁。

P：我就比較欣賞上一輩嘅歌手，好似關淑怡、台灣嘅順子同甄妮，甄妮啲聲波，可以震死我。歌手要個樣靚就要靠醫生啫，歌唱得好就要靠自己，冇人幫到你囉！

多棲發展難專注

P：有時我又覺得依家啲歌手唔係咁專注，除睇佢本人有冇心，拍戲時會唔會諗緊今晚去邊度玩，唱歌時又諗咗尋日做咗乜外。因為要趕住出碟，連歌詞都未齊，唱片公司就叫個歌手去唱，根本個歌手都未ready。

E：我都試過！有時趕起上嚟，公司好多嘢都安排咗，錄音室book咗，但歌詞有一句仲未有囉，咁惟有錄住先。

P：點唱呀？唱住頭同尾先，爭中間嗰段呀？

E：咪搵啲嘢塞落去先囉！英文、日文乜都好，求其唱住先，當練歌。

P：我錄音一定會帶住支筆，因為我係唔跟歌詞。唱唱吓，靈感到會再改，叫啲人食飯先，一陣再錄過。

E：我都有寫歌。七月時，我作咗人生第二首歌，初時我好擔心，因為係幫一個電台重頭節目作開場歌，嗰時我個心諗住一定要挑戰自己。

P：我都有聽過，作得好好呀！先撇開你作成點，但你肯去做，做咗唔知得唔得，但唔做一定唔得。要有嗰種精神，有信心，呢啲先有進步。我都成日鼓勵啲歌手去作曲，歌手可以畀篇稿我，去幫你填詞。

E：好呀！雖然你係我偶像，亦係大師級，但我敢搵你幫我填詞o架！好似我作嗰隻電台歌咁，我會成日諗，點先可以作出一首見得人嘅歌呢？我真係連小宇宙啲汁都榨埋出嚟，我要衝破自己心理關口。

P：靈感係會自己嚟搵你，有時真係冇，我會睇報紙，同play番立法會嘅片嚟睇。我去遊行，除咗表達自己意見外，另一個原因係我想接觸人群。我會用部攝錄機拍低啲市民遊行情況，我好歡迎佢哋同我講，好似申冤咁。

E：我就會不停咁亂彈結他，我覺得有主題會容易作啲。聽你咁講，你下次去遊行，記得帶埋我去攞靈感。

不介意別人整容

E：講真依家啲人個個下巴都好似，都係咁、咁咁同咁。

P：好似韓國藝人咁，個樣好似倒模出嚟，你又係用二號鼻，我都係喎，大家都可以傾吓偈。

E：其實鼻樑同鼻頭一樣高，真係好奇怪囉！

P：「拱」晒出嚟好好笑。

E：我試過一次，我真係唔認得嗰個女仔，我講真o架！同佢有一段時間冇見，但一擰轉頭望，我個腦轉咗百幾嘢，我好驚佢知我唔認得佢呀！

P：我係唔介意整容嘅，又唔係同佢過人世，如果佢整咗有信心係OKo架。

E：我可唔可以補充一句，我都係唔介意整容，最怕我講出嚟會得罪好多人。

P：如果得罪人，你咪話係阿Paul講囉，我得罪開人，呢啲粗重嘢等我嚟啦！

採訪：音樂組

攝：沈健程

場地：Eutopos Studio

化妝：Johnthan Li@MOD Academy

髮型：Niki Lee@Headquarters（黃貫中）、Eve Chiu（Ella）

服裝：AFFLICTION