杏兒奸出汁 自信封后
雖說後宮波譎雲詭，電視台何嘗不是爭強好勝的戰場？當年僅得19歲的胡杏兒，獲選為港姐季軍後幾經跌宕，經過逾十年努力，今天已躍升當家花旦，更憑《怒火街頭》及《萬凰之王》中奸到出汁的王后成為視后大熱門，天時地利兼備，難怪杏兒揚言有「一百分」信心封后！
首次挑戰宮廷戲《萬凰之王》的杏兒，飾演機關算盡的王后，眉梢眼角可謂奸到出汁，但她卻謙說尚未夠火候：「我覺得自己可以再奸啲，但唔想太過表面，因為個角色雖然衰衰格格，但其實都有善良一面，好真實！」
宣萱鬧交冇得頂
再度與前輩宣萱合作，杏兒已由《流金歲月》的弱智妹蛻變成統領後宮的火鳳凰，她說：「今次好多對手戲，過足戲癮。（宣萱多是非？）佢係有原則同要求，好多好難嘅對白都講到，連鬧交戲都一take過。（升咗呢？）係，今次對住佢谷到盡o架！」
正如一輛踩行油的跑車，杏兒今年誓在台慶跑道上首名衝線，她說：「依家套劇開始播就有壓力，不過攞呢個『終極獎』係講天時地利人和，今年好幸運，天時同地利都配合到，亦希望唔會令公司失望。（信心？）點都要話100分！（親生女着數啲？）希望個獎係因為觀眾鍾意而攞，咁樣意義更大，所以都擔心因為套劇遲播而有影響。」
至於誰是跑道上的攔路虎？杏兒深知對手眾多，同劇的宣萱、《潛行狙擊》的陳法拉及《法證先鋒III》的張可頤均是民心與實力兼備。談到視帝心水，杏兒顯得左右為難，拍檔鄭嘉穎與「男友」黃宗澤可謂魚與熊掌：「鄭嘉穎做得脫胎換骨。（黃宗澤呢？）好多人撐佢，咁我都撐！總之兩個都撐啦！」
攝：沈健程
髮型：Billy@Hair Culture
化妝：Phoebe Yung
文：影視組