祖兒爆與Mani勁吵擁抱降火
容祖兒（Joey）昨與林欣彤等為英皇電影《DIVA》開工，於戲中出動不少私伙的Joey笑言為電影準備了三箱衣物隨時standby，又大爆與Mani（霍汶希）曾於演唱會前大吵，最後亦以擁抱作結。
Joey昨於清水灣片場與鄭家維拍攝上落車戲份，雖然天氣炎熱加上着七吋高跟鞋，但仍毫無怨言的多次重拍鏡頭，表現專業。於戲中飾演天后的Joey透露為了配合角色，不惜出動私伙撐場，她笑說：「如果真係要着得靚，我怕成套戲個budget唔夠，我都準備咗二十幾套衫，屋企都仲有三箱衫、鞋同手袋侍候！」Joey又不諱言由於角色情緒起伏大，令她增添不少壓力，她說：「雖然有好多人都話我演番自己，但呢個我好少呈現畀大家睇，會感性啲，有好多喊戲。」
忍得就忍
談到喊戲的話題，Joey透露其中一場要與飾演她經理人的杜汶澤大罵，問到現實中有否試過與Mani對罵？她即笑說：「一係我鬧佢，一係佢鬧我，好少會互鬧，因為大家都知冇好結果，可以忍就忍啦！」而令她印象最深刻是有次Mani為其準備演唱會前安排訪問，二人有所爭執，最後以擁抱收場：「其實我知大家都係為件事好，所以盡量互相配合。」
對於早前有內地雜誌指她與何韻詩於英國「秘婚」，Joey即直斥報道：「黐線，黐咗線，唔會！（嚇親fans？）唔係事實所以唔驚，呢個世界真係無奇不有，雜誌都係為咗博銷量，我會保留追究權利！」
唔使咀戲
另外，緋聞男女林欣彤（Mag）及陳家樂同場亦未見尷尬，問到二人是否拍拖，他們合拍地說：「係呀，喺戲入面！」問到二人有沒有發展可能，Mag不置可否說：「同任何人都唔可以話有冇可能！（同家樂有冇親熱戲？）拖手同攬，好彩冇錫戲，係我會驚。」 文：影視組