亞洲遊戲展換大使 阿嬌登場撼低陳冠希
陳冠希（Edison）負面新聞不絕於耳，近日再流出跟16歲學生o靚模謝芷蕙（Cammi）所拍的親密慾照，更被女方踢爆他鍾情玩cosplay，但「啱晒嘴形」的電子遊戲展都買佢怕，廣告商決定重金禮聘邀請Twins取代近期被圍插的Edison，擔任新一屆的「亞洲遊戲大使」。
近日又再流出Edison半裸上身跟16歲的Cammi拍攝多張親密慾照，慘遭追訪的Cammi事後踢爆Edison愛玩cosplay，為她準備不少cosplay的制服影相，難怪去年亞洲遊戲展都邀請他擔任「亞洲遊戲大使」。
阿嬌：年年唔同人
Twins成員鍾欣桐（阿嬌）曾經跟Edison有過一段情，雖然她早跟對方劃清界線，日前在活動上更聲言不想再回應有關他的問題，偏偏今次亞洲遊戲展邀請二人取代Edison擔任遊戲大使一職，再次被拉落水的阿嬌都大感無奈。Twins昨日為今次大使活動拍攝廣告及主題曲MV，阿Sa大騷香肩及美腿，非常搶眼，對於Twins以重酬身價撼低Edison，阿嬌大方回應說：「年年都搵唔同人架啦！」而身旁的阿Sa亦不忘出口為她解圍：「總之今年係我哋啦。」隨後即不願多談，轉移話題大講打機趣事。
眉飛色舞講打機
平日工作忙碌的Twins對打機相當感興趣，阿Sa喜歡玩踢足球game，不過對手並非男友陳偉霆，反而向「機王」古巨基埋手，向高難度挑戰，她笑言：「其實真係好難踢，未到半場就已經7：0大比數落敗，真不愧係古巨基。」而阿嬌笑言不喜歡玩格鬥或者動作遊戲：「呢啲遊戲玩得太激，手指會好痛，所以都係鍾意玩智力遊戲多啲。」
Twins透露今次主題曲將收錄於全新的廣東大碟，預計明年農曆新年會推出，阿嬌說：「上次國語碟我都有份作歌，希望今次都會參與創作，我同公司傾過想做一首輕快嘅歌，依家開始搵緊靈感！」對於近日流傳楊千嬅跟填詞人黃偉文（Wyman）鬧不和，二人更用粗口互相數臭對方，曾經跟Wyman合作的Twins都表示未有聽聞，相信並非事實。
文：音樂組