朱茵爆有晒結婚計劃
朱茵和黃貫中（Paul）相愛11年，但阿Paul卻說未想過結婚，朱茵踢爆男友講大話，指兩人早有計劃，更說每年生日及情人節定必收到男友的紅玫瑰，大讚阿Paul癡心情長，是可付託終身的好男人。
朱茵對於男友阿Paul曾說只會「即興」結婚，她無情地踢爆：「梗係唔係啦，我哋一早有計劃，佢只係唔公開啫。（有冇收過戒指？）我唔講你知。」她心目中的夢幻婚禮是在一處充滿陽光的地方舉行，不用太豪華，只要感覺溫馨。問她可會公開婚訊？朱茵說：「一定會，到時必通知大家，但結婚唔係短期內，因為我同阿Paul都好忙。」
生日情人節收花
朱茵指男友外形不羈，其實相當浪漫，她透露：「每年我生日同情人節，一定收到至愛嘅紅玫瑰，有次佢出埠做嘢陪唔到我，都託朋友送花畀我，11年啦，從未間斷過，我好心甜。」她又指雖然男友予人狂人的感覺，事實上她完全「食硬」阿Paul，朱茵晒命說：「佢好錫我，連我屋企人都錫埋，佢話我開心佢有運行，呢句係真，因為我心情唔好，就會影響埋佢嘅心情。」
阿Paul縱橫樂壇多年，身邊不少瘋狂女歌迷，朱茵指阿Paul的歌迷很愛錫她，早已稱呼她為「阿嫂」，她說：「我哋各自開騷時，兩批歌迷都會嚟撐我哋場。」
愛他藝術家個性
朱茵又覺得和男友的愛情歷久不衰，全因兩人性格太相似，她說：「我同阿Paul都係可以為藝術放棄一切嘅人，唔會吓吓都睇錢，但如果我或佢做人現實啲，或者我哋會有更富裕嘅生活，不過我就係鍾意佢咁有藝術家嘅個性。」
採訪：音樂組
化妝：Jonathan Li@MOD Academy
髮型：Jacky Leung@IL Colpo
服裝：AFFLICTION
場地：彌敦酒店