超盈名花有主冇男仔敢埋身

賭王千金何超盈昨日出席品牌活動，短打上陣的她左腳小腿出現一道長長的疤痕，她扁晒嘴表示：「有日行街，唔覺意畀個婆婆用架手推車車親，流好多血！」對於日前被本報拍到在蘭桂坊消遣有幾位男士相伴，她說：「朋友唔係男就係女啦，全世界都知我有男朋友，仲邊有人夠膽追我，所以男友都好放心，大家都識咗咁耐啦，冇理由叫班着住高踭鞋嘅女仔送我搭車啫，班男仔都係有風度嘅表現！」她表示平日甚少夜蒲，只是趁萬聖節出去消遣一下。提到爸爸何鴻燊快將舉行壽宴，超盈表示：「我已經籌備緊，揀定禮物喇，今次個party咁大，會揀啲特別啲嘅禮物！（男友到唔到？）佢會嚟，禮物就唔知佢喇！」