阿旦思嫁 忟阿感未ready
有「E級教主」之稱的靚模鄧伊玲（阿旦），與男友阿感拍拖多年，最近兩人感情生變，阿旦更已「離家出走」，遷出與阿感同居的單位，令二人進入冷靜期，阿旦更被拍得與猛男「大乳力宏」公園相會！而兩人出現問題的原因乃阿感「未定性、未ready」！
阿旦與無綫主持阿感早已是公開的一對，不過她最近被本報踢爆遷出與阿感在九龍塘同居的單位，更與一猛男公園相會玩狗。問到她與阿感的問題所在，阿旦說：「最初識佢嗰時好熱情，當我小公主咁，但係拍拖耐咗之後慢慢冇咗熱情，太穩定，好乏味！（有冇嘈大交？）唔係嘈得好激動嗰種，都好平靜。」
離家出走冇挽留
阿旦表示有與阿感說清楚問題所在，但她覺得阿感仍然「未ready」，她說：「我想計劃結婚、儲錢，但佢個人冇咩計劃，佢話『係時候就係時候，到時借錢結囉！』其實每個月儲二千，五年都十二萬，不過佢就係唔願儲！我每講一次佢就話『小事啫』，最後都係當耳邊風！所以我『離家出走』（離開同居的家）去咗朋友度住，希望可以變一變，起死回生。」問她離家後，阿感有否挽留？她說：「冇咩，因為佢個人好淡定，好有自信，一啲都冇擔心過。（佢唔驚冇咗你？）佢仲未定性，有時我都會好忟！」
「希望問題解決」
問她想不想識新男友？她說：「唔想諗住！仲係鍾意嘅，只係冇以前咁冧，可以諗吓辦法去tune，希望解決個問題先，其實要識新朋友，我同佢都好易。」話雖如此，她卻被本報拍得日前與猛男在公園玩狗。
文、攝：王羽飛