Bosco喊住嗌：太辛苦喇
劇集《衝上雲霄》十年後再拍續集，黃宗澤坦言想游說劇中靈魂人物吳鎮宇演出。回顧十年拍劇史，他最難忘因為連續密集式通頂拍劇以致雙眼矇查查，睇人只看到一半，忍唔住在化妝間喊住講「太辛苦喇」。
2000年正式入行主持音樂節目，首套劇集係02年嘅《衝上雲霄》。當時公司栽培一班後生仔，組合為「S4」，我、吳卓羲、馬國明、陳鍵鋒被安排拍《衝》。當時成班後生仔開工好開心、到依家都好難忘，但係就唔敢睇番當年《衝》嘅演出，覺得自己傻吓傻吓戇居居咁！哈哈！
想抓鎮宇拍《衝Ⅱ》
但要講開始鍾意做戲，其實源於《衝》，當時又好彩撞到吳鎮宇，拍戲嗰陣佢會不經不覺畀咗好多嘢你，當然好希望請番鎮宇返嚟拍《衝Ⅱ》，自己喺度諗，鎮宇、秋生、青雲都係TVB出身，如果請到佢哋其中一個返嚟拍《衝Ⅱ》都已經好正，我都想幫手拉攏吓，自己都好希望有份演出。
拍劇十年，最難忘的係05年搏殺期拍《強劍》，試過趕戲兩、三個禮拜，每日瞓兩、三個鐘，有朝開06，起身對眼已經矇查查，返到公司就暈陀陀。打電話畀PA話要瞓一個鐘，瞓完行去服裝間見到啲服裝姐姐點解得半個人嘅，去到化妝間住塊鏡喊……當時我問自己為乜呢？太辛苦喇！阿佘（佘詩曼）都走過嚟叫我請假返屋企瞓啦！但係當時狀態點返到屋企呢？走去休息室瞓咗兩個鐘，醒咗又冇乜嘢喎，咪繼續拍囉！當時開住turbo唔知辛苦，依家就冇咁捱得喇！以前唔飲咖啡，依家要飲齋啡嚟提神！
開工拍檔--齋啡
訪問當日是下午，除去黑超的Bosco有點惺忪，明顯剛剛起床。Bosco點了一杯齋啡，深深吸了一口即往外拍照，喝過齋啡後明顯醒神得多，是咖啡因引發的作用不得而知，或許齋啡是給自己一個開工訊號吧。
Bosco現時每逢開工都例必飲齋啡，最多試過一天飲了七杯齋啡，直接反映他的當紅及忙碌程度。
口述：黃宗澤 筆錄：影視組 攝影：沈健程