莫文蔚下月開P舊愛冇份
新婚的莫文蔚（Karen）昨日結束蜜月之旅，隻身由倫敦返港為電影宣傳，老公Johannes則返回意大利工作，兩人天各一方令Karen牽掛不已；而他們將於12月18日搞結婚派對，對於會否請舊愛周星馳和馮德倫出席，人妻Karen推搪稱未諗，絕對體貼和畀足面老公！
剛於10月1日在意大利下嫁老公Johannes的Karen，昨午約2時單拖由倫敦返抵港，戴了黑超的她心情大靚，笑容燦爛向傳媒示展婚戒，她說：「自己離開咗香港2個月，一個月籌備婚禮，一個月度蜜月，去咗波爾多酒莊，因為我哋鍾意飲紅酒。（買間酒莊？）嘩！冇諗過。」Karen謂老公返了意大利工作，自己就要開工為電影《東城西就2011》宣傳，問是否唔捨得老公？她甜笑說：「梗有少少。（蜜月時趁機造人？）吓，冇計劃要生小朋友喎。」
「未諗」賓客名單
此外，Karen透露老公將於12月來港，宴請所有朋友出席雞尾酒結婚派對，問會否請舊愛周星馳和馮德倫出席？Karen想了一回後說：「未諗名單喎，估12月圈中人會好忙。」追問她會否嘗試邀請？Karen繼續推搪說：「未諗。」剛為人妻的她，果然十分體貼老公感受。
男遊客衝前祝福
派對過後，Karen將跟隨老公返回意大利過白色聖誕，但否認工作方面會減產，她提高聲線強調：「我咁愛工作，只係時間要分配好啲。」對於李玟搞1.5億元超豪婚禮和好友梁詠琪閃婚，Karen笑說：「呢排好喜慶好多人結婚。」訪問後突然有位大陸男遊客衝向Karen大嗌：「恭喜你！」見慣大場面的Karen亦表現淡定，並有禮貌跟他握手答謝。
採訪：音樂組