徐子淇湊仔如初戀老公呷醋
千億新抱徐子淇出席慈善活動時大騷Fit爆身材，不過她坦言怕傷身，又不用再當Model，故沒有刻意減肥。期間徐子淇又大談仔女經，自言囝囝出世後令她重拾初戀感覺，像是多了一個小男友般，整顆心都融化了，更連老公李家誠都呷囝囝醋。
徐子淇、任達華和歐陽妙芝等昨日現身慈善義賣活動。身穿低胸連身短裙的徐子淇，以智行基金慈善大使身份出席，身材Fit爆的她還在台上分享和細仔李俊熹的溫馨合照。問她是否比生仔前更纖瘦，她表示：「應該唔夠之前瘦，不過我唔想減肥，唔想傷身，依家唔係做Model，淨係想健健康康。」
至於照顧三個小朋友的運動量是否很大？她坦言：「係，我每日瞓得五個半鐘咋！（要親力親為？）如果有能力都想自己湊，外傭唔會教只會寵，自己湊先會聽話。三個小朋友都花我好多時間，又要陪老公。其實老公都冇幫手湊BB，只負責同佢玩。」她又表示暫時不會再生多個，一切隨緣。
「你又睇佢唔理我」
徐子淇又透露囝囝現在已有十六、七磅重，肥嘟嘟很可愛，更自言囝囝出世前覺得自己會錫囡囡多些，但囝囝出世後竟令她重拾久違了的初戀感覺，像是多了一個小男友一樣，整顆心都融化了。問到如此疼愛兒子，老公有沒有呷醋？她笑言：「有呀，好搞笑，佢見我去睇囝囝會話『你又睇佢唔理我』。我夜晚要等佢瞓咗先去睇囝囝同餵夜奶，之前又要陪咗家姐先，不過家姐好錫細佬，冇呷醋。」
開P畀朋友見BB
另外，提到本報昨日獨家報道她將為囝囝舉行Party一事，她透露：「之前已經同屋企人食咗飯，但有好多朋友都未見過BB，想一次過畀啲朋友見。」而她大伯李家傑的三胞胎到時都會一起參加，Party的主題是馬戲團，她說：「到時個Party會好似個嘉年華咁，囝囝依家咁細未識，但兩個家姐會好開心，囝囝第時睇番都會好開心。」
文：名人組