陳柏宇換公仔冧女煙韌掃背
歌手陳柏宇（Jason）早前因拍攝電影與符曉薇火速撻着，前日二人於中環煙韌拍拖。期間Jason更情不自禁當街掃伊人玉背，又於便利店換公仔冧女。事後直認戀情的Jason甜蜜表示戀情剛剛開始！
曾於活動上獻唱時突然激凸而成名的陳柏宇（Jason），自與裕美分手後感情一直未有着落，但最近Jason於電影《喜愛夜蒲》中，與有份參演的江若琳師妹符曉薇（Leanne）合作後火速撻着！
前日下午五時許，Jason與Leanne於中環煙韌拍拖，二人邊行邊親熱談情，還突然停步拿着電話一起研究。未幾Jason突然煙癮起，Leanne便陪伴男友步出商場外抽煙。之後兩人又折返商場閒逛，當時Jason見附近途人不多，即情不自禁頻頻輕撫女友玉背，Leanne表現冧爆，並向男友餵食香口膠回敬。Jason之後急急腳步往附近的便利店，原來他特地換購近期熱爆的公仔冧女友，氹得Leanne甜甜笑，Jason亦開心到四萬咁口，果然恩愛！
甜絲絲認戀情
本報昨日聯絡Jason，他大方承認戀情，更甜絲絲說：「其實我哋都係啱啱開始，大家都好開心。希望畀啲空間我哋啦。」至於Leanne初時對戀情支吾以對，但當得悉男友大方承認拍拖後，她笑言：「同公司有共識，感情生活低調處理。（Jason好man，大方承認戀情？）佢不嬲都咁man架。」
文、攝：追蹤組