李丞責：戀情順順利利
堪輿學家李丞責與前港姐劉倩婷曾多番否認拍拖，但近日戀情似進入白熱化，前晚首次恍如情侶姿態現身，不過女方顯得避忌拘謹，先拒合照，後撇下「另一半」應付記者，李丞責則表示戀情發展得順順利利！
前晚李丞責單拖抵達NARS化妝品牌活動，只見他遲遲不入場在呆等，不久劉倩婷現身，二人如情侶般進場，這是傳出戀情後首次孖公仔出席活動。不過，女方拒絕合照十分害羞，記者再三要求下拉攏一位工作人員才肯三人合照，甚為避忌，劉倩婷更堅拒齊齊做訪問，只拋下一句：「我唔得、佢得（指訪問）！」說罷便撇下另一半去應付記者，問到為何那麼避忌？李丞責說：「好人好姐做乜避忌！（你哋發展成點？）搵日得閒慢慢講。（係咪已拍拖？）順順利利！（咁係咪差唔多拍拖？）好難界定，適當時候會講，現在係朋友。」
諸多解釋難掩真情
當問到關係進展如何？他沒有正面回答：「我只代表自己意見，做朋友都係要講緣分！要交往就要經歷時間先可以更交心同了解。（你哋經歷咗未？）識咗唔係好耐，有待發展！」問他是否相約出席？他表示沒有：「係朋友都會喺門口等埋先入去！」雖然解釋多多，但口徑與行動卻不一，似乎戀情已進入白熱化！
Rosemary拍拖參賽
同場的Rosemary性感上陣，提到將參加毅行者，她說：「今晚都要訓練，要跑三小時，不過我好有信心。上次跑全程二十八個鐘，相信今年成績更好。其實有一team人參賽，四個人一組，當中包括自己男友。」
文：名人組