祥仔:健仔技巧勝浩民

視帝黎耀祥捱了廿年才有出頭,不計柴九和劉醒,大家印象最深刻的,必定是「裏外不是人」的豬精豬八戒。然而,祥仔演過由張衞健及陳浩民主演的《西遊記》,由豬精去品評兩代孫悟空,最適合不過。

十幾年前接拍《西遊記》,冇諗過有咁大回響,因為當時TVB同期有另一部大製作,所以宣傳資源都落晒嗰套劇,反之《西》劇就冇人理。點知最後爆出係孫悟空,收視口碑都好好,認真始料不及,公司都打咗個突。

《西遊記》重點一定係孫悟空,但我覺得豬八戒發揮都好大,平時見我老婆行路似鴨仔咁得意,我咪學佢行路,再誇張十倍,所以大家見到豬精行路其實好似一隻鴨,真係好好笑。

拍足二十個鐘

不過,拍呢套劇真係好辛苦,每日幾乎拍二十個鐘,所有戲都講我哋師徒四人,無論外景、廠景都有江華、健仔、麥包(麥長青)同我。所以我哋四人友誼,都係呢套劇去建立。話雖如此,我哋從來冇話收工食消夜、唱K直落呢啲嘢,都係嗰句啦,每日都拍到天昏地暗,幾乎冇咗半條人命,仲邊有精力出去蒲?不過,男人嘅友情在心中,呢段日子幾個男人走埋一齊,真係幾有趣。

兩人完全唔同

即使到依家,好多人都講健仔同浩民做嘅孫悟空有乜分別!有健仔珠玉在前,大家亦對浩民寄望甚殷,所以佢壓力真係好大,當時浩民好Fresh,但好多鬼主意,成日會度新橋喺馬騮精身上,演出嚟同健仔有好大分別,可以話完全唔同。當然,健仔演出技巧會高過浩民好多,要浩民同佢比,真係有啲為難。