何尚謙為食單飛做老闆
前男子組合Square成員何尚謙（James）飛起兄弟單飛出發，開舖頭做老闆，向飲食界進發，James笑言望由「為食王」進化成「靚仔廚神」。
男子組合Square正式拆夥，成員以單飛形式各有各忙。James除了繼續向電影方面發展外，更開拓娛樂圈以外的另一片天空，注資好友位於東大街的小食店，向「飲食界巨子」名銜進發，他說：「同呢個朋友識咗好多年，大家都鍾意食嘢，特別係煎炸嘢啦，閒時坐埋都有研究吓，因為嚟緊想開分店，所以就叫我夾份囉，今次投資對我嚟講應該係為自己多過賺錢，你諗吓，做老闆我咪可以任食唔使錢囉，（唔怕同朋友因財失義？）都有深思熟慮同傾過呢個問題，大家有咗共識，如果有意見分歧就包剪揼決定，贏咗嗰個決定！」
親身巡視業務
早前James以老闆身份落舖巡視業務，更變身廚神落手落腳炮製美食，他說：「平日喺街見人整覺得好容易，試過先知要控制個火候真係唔係咁簡單。」James感到做老闆比想像中難，要慢慢學習，他說:「初初有諗過畀錢出嚟咪得囉，但自己又有好多想法實踐，好似生咗個仔咁，好難話唔理就唔理，依家咩都講健康，將心比己都想研究唔肥又好食嘅食品。」
採訪：陳寶