王淑玲回復自由唔驚冇劇拍
味之天使「香蕉」王淑玲（Vanko）近日與無綫終止經理人合約，決意向外闖。她不擔心減少拍劇機會，反而回復自由身可令她作其他嘗試，闖出新天地。
早前因主持飲食節目《街坊廚神》而人氣急升的Vanko，近日決定與無綫終止經理人合約。她說：「之前公司有同我傾續約，最後決定唔再續，回復自由身，方便接出面啲騷同模特兒工作。」Vanko不擔心因此減少拍劇機會，因為若角色適合，她相信監製會量才而用。提到無綫近日的挖角潮，她直言收到電話，但仍然考慮中，金錢及發展機會才是重要考慮因素。
遠離煎炸食物保靚聲
雖然與無綫沒有合約，但Vanko仍忙於拍劇，先後接拍了《當旺爸爸》及台慶劇《法政先鋒Ⅲ》。她在《當》劇飾演《超級巨聲》參賽者，為了增強說服力，她不時在家中練歌，又遠離最喜愛的煎炸食物，力保住靚聲，似過着真正歌手的生活。
Vanko又稱拍《法》劇時眼界大開：「呢套劇係大製作，好多大場面平時見唔到，而且又可以親身向老戲骨張可頤同黎耀祥偷師，獲益良多。」
文：專案組
攝：司徒國榮