徐子珊破格揸槍作反
徐子珊入行後演過五次女警，但為無綫拍節目巡禮時，卻一嘗做大肚婆毒販滋味，子珊笑言終於不用做警員，拍攝時更要她持槍指嚇滕麗名。而苗僑偉及郭晉安則表示劇種新鮮，望公司投放資源拍攝有質素劇集。
徐子珊、滕麗名（阿滕）、苗僑偉（三哥）、郭晉安前晚拍攝2012節目巡禮劇集《雷霆掃毒》（暫名），當中不乏開槍火併場面，扮警員的安仔穿上避彈衣上陣。子珊表示之前曾為《衝上雲霄II》節目巡禮拍攝，希望有機會參與演出，坦言是經典劇，播第一輯時她還未入行。
《雷霆掃毒》中，子珊以大肚婆毒販造型上陣，更揸槍指嚇阿滕，場面緊張。她說：「今次唔使再做警員，入行以嚟我已經做咗五次，有機會轉演反派都幾得意，但未知正式拍時係咪我做。」而阿滕表示現忙於拍處境劇，每日朝開晚收，她說：「好耐冇試過返朝早七點，真係有壓力。」
三哥表示《雷》劇將於明年一月開拍，問他做警員還是毒販，他笑謂：「依家仲諗緊，冇所謂，我又唔介意做反派。」簽部頭合約的他坦言明年會為無綫拍兩套劇，說到挖角潮會否擔心劇集質素，三哥坦言：「既然王維基搶人，TVB快啲請人囉！（王生有冇搶你？）傾過偈囉！我哋呢啲自由人，最緊要無綫拍有質素、有保證嘅大製作，但都係好事，起碼依家啲同業受到重視。」
安仔為家庭推job
安仔自拍搞笑戲後，公司已多年沒找他拍警匪片，他坦言拍這劇種最緊要公司願意投入資源，他說：「我多年來都同公司簽部頭加經理人合約，呢幾年中、港兩邊拍，依家嘅工作模式我好enjoy，始終我想多啲時間畀屋企，為家庭放棄咗好多工作。」
此外，馬浚偉對於有指是騎牆派，先後在陳志雲及樂易玲身邊攝位，他無奈說：「一笑置之啦！我從來都話曾勵珍係我恩師，陳生喺合約上畀好多意見，樂小姐一直接觸唔多，話我擦樂小姐，大家會唔會信？」
文：影視組