嫌個胸細想隆大啲 Jeana認整容！

如今o靚模千人一面，若只靠樣及事業線搵食，五官上圍非要與別不同。坐擁33C不倒的Jeana，甫出道就被指是翻版范冰冰，曾多次被圖文並茂踢爆整容，但她一於少理，更公開講不排除整容可能性，為求變靚啲，Jeana終於把心一橫做手術。

任由美容顧問篤胸

雖然Jeana胸懷大志，擁有遠近馳名「不倒胸」，但她似乎仍未滿意五官及身材，狠下決心拋開父母授予的身體髮膚，將自己完全改造。從Jeana近日出席公開活動的照片跟之前相比，雙眼皮深邃之餘，尖尖下巴幾可篤穿紙，的確愈變愈靚。

據知，Jeana已做了雙眼皮手術個月多，上周到尖沙咀覆診時，她任由醫學美容顧問篤胸脯，又不時檢查她眼部康復狀況。只見Jeana不時拿着鏡子狂照，似乎十分滿意如今的容貌，即使認不出自己也不在乎。

據知，做完雙眼皮手術後，Jeana之後會接受醫生建議，進行隆鼻及瘦面療程，把五官大執，更不排除隆胸，將原本33C上圍升多一至兩Cup。

嫌自己胸細的Jeana想隆胸，任由醫學美容顧問檢查胸部。

Jeana考慮進行隆鼻手術。

歡迎同行交流心得

記者致電Jeana，對於成為首位承認整容o靚模，她說：「係，有做過我唔會唔認，不過依家只係做咗雙眼皮手術一個月，我嫌個胸細想隆大啲，所以唔排除整！」問怕不怕被其他o靚模恥笑「打假波」及「MJ面」？她即拉埋同行落水，暗指其他o靚模都整容：「唔怕啦！MJ咁傳奇，我有佢成就就好。我亦都唔怕畀人話囉，歡迎同行同我交流心得，反正大家都有經驗。」

問家人有否反對？她說：「屋企人已知，佢哋都好尊重我嘅決定，只係擔心我痛囉！其實我都唔怕痛嘅，自己一向貪靚，都係想自己靚啲啫！」據知，Jeana能把心一橫整容，完全是飽受情傷所致，因為前圍村有米男友一直反對她整容。如今已經甩拖，反而加速她引刀一快，完全改造！

文：專案組