官恩娜保靚妝嚇到唔敢郁
官恩娜（Ella）日前與電台DJ阿Lu一齊到鬼屋探險，自稱天不怕地不怕的Ella入到鬼屋竟不停𠵱嘩鬼叫，但為保靚妝不敢亂走狂奔，她笑言：「好壓抑呀！」
萬聖節將至，Ella與阿Lu為電台節目《甜心家族》勇闖迪士尼，阿Lu原本以為可將Ella嚇餐飽，豈料Ella一到場就顧住四周圍影相留念，十足一個大細路，仲大大聲話自己連鬼都唔驚！
Ella說：「我冇嘢驚，最怕係個妝溶，點都要靚，哈哈！」但當她步入鬼屋時才開始識驚，即時扯實助手衫尾，步步為營。Ella笑言：「我唔驚鬼，但好怕黑麻麻睇唔到嘢。入到鬼屋全部都係冇頭鬼，點知無啦啦有幾隻突然彈起身，嚇到我狂尖叫，但因為錄緊音，又唔敢太失儀，好壓抑呀！」
掃貨定驚
離開鬼屋後，Ella即時回復女人本色，入紀念品店掃貨定驚，她更拿起幾乎一比一的Jack公仔翩翩起舞，令在場的小朋友睇到O嘴。她說：「我要買紀念品返去畀媽咪同埋屋企人。（男朋友呢？）佢唔使啦，或者遲啲冇咁忙，睇吓會唔會帶佢一齊嚟玩。（攬實男友玩鬼屋？）唔使啦，我玩過，唔會再咁驚！哈哈！」
採訪：卓藍