區文詩捧場Julio發晦氣
孖仔組合Soler（Julio和Dino）前晚為音樂會演出，大孖Julio與區文詩（Angela）雖然分手三年，但同場依然冇偈傾。提起Angela，Julio更即時發晦氣黑面。反觀Angela表現大方，被問當年分手有問必答。
前晚Soler、吳國敬、呂珊、蔣慶龍和張武孝（大AL）於九展舉行音樂會，Julio舊愛Angela亦現身捧場。當一眾歌手及捧場嘉賓大合照時，Julio和Angela全程零交流如陌路人。問Julio有否見到Angela時，他即黑面兼晦氣說：「係咩？唔知！（你唔知佢嚟？）唔講私人嘢，我哋今晚係嚟講音樂，唔係你哋嚟做乜？」
「希望冇影響佢演出」
其實兩人於○八年分手，之後Angela戀上鈴木仁，雖然事隔多年，但Julio提到Angela仍黑面。反觀Angela大方說：「今晚係我公司搞嘅騷，我身為歌手一定要到，我都知佢喺度，後台都見到佢，但冇機會打招呼。」問到Julio如此反應，是否當年不歡而散？她說：「我哋都三年冇見，之前我都有SMS搵佢寫歌，佢都有SMS覆我，後來佢覆番我公司話好忙冇時間。（當年分手唔開心？）我自己冇唔開心。」
問到覺不覺Julio小器？Angela說：「我唔想諗太多，可能佢就嚟出騷，唔想講緋聞，希望冇影響佢演出啦。」再問是否她提出分手？Angela笑言：「其實我哋都冇講一齊過。（佢對你好有仇恨？）咁你要問佢喇！我都想知，我就冇。」文：音樂組