林保怡：比北上更加「砰」一聲

我同無綫今年五月結束合約，當時完全冇目標，只知遠至烏魯木齊、哈爾濱都有人叫得出我個名，我想試試出外闖，有投資方知我同無綫冇約，想即刻簽我，我冇動筆，雖然我個心好急想做嘢，但我有更清晰目標，我真係唔只值一千八百萬人仔，幾個廣告、幾個商演，都已經唔止，就算畀好多錢，但要你拍爛劇，你又可以拍幾多年？三個一千八百萬 ，都唔夠六千萬，夠食過世咩？

機會不止一個

結果後來機會真係愈來愈多，我收到內地一個好好嘅劇本，同一時間，日本富士電視台亦都搵我拍《六個陌生人》，我覺得呢個劇直情為我度身訂造，連內地製作單位都同意，咁我可以點抉擇？後來內地話會再執靚個劇本等我。

林保怡依家唔係北上，而係向亞洲發展，富士電視台個劇係同唐澤壽明等紅人合作，高清電影拍法，仲會喺日本、韓國兩地播出，我個角色仲要係組長，係男一號，主角得好緊要，比北上更加「砰」一聲。

無意再做歌手

雖然香港即將出現電視台競爭，會百花齊放，但我覺得欲窮千里目，更上一層樓，要往外闖，將來我希望兩年拍三個劇，其中有一部係香港製作，但一定要係好劇本。

至於再做歌手，我真係冇諗過，你叫我去商場表演、去澳門唱45分鐘，我會好投入，當concert咁唱，但叫我做歌手，我怕記歌詞，連我自己都唔知點解。

口述：林保怡　筆錄：影視組