超雲不作評論：山聰識處理！
日前伍詠薇在微博自爆與「友人」反目，陳山聰成為嫌疑人物，昨日賭王千金何超雲出席慈善活動時，坦承知道此事，但開腔力撐男友懂得處理，投愛郎信任一票。
昨日何超雲與母親陳婉珍出席影音使團舉辦的「生命因您燃燒」慈善義賣記招，二人並即場把身上的首飾脫下，捐出作義賣，善心無限。陳婉珍透露即場所捐出的頸鏈及手鏈，正是由超雲小時候設計，之後她再找專人訂造，而超雲所捐的頸鏈則是她最近設計的作品。
目標籌200萬
超雲透露已捐了數箱衣物及手袋，目標是籌得二百萬，問到有否叫山聰參與義賣？她表示：「冇叫。今日講慈善，唔關佢事。（叫佢買番你捐出嘅衣物？）睇吓佢會唔會，你問吓佢。（有冇邊件唔捨得捐？）冇，為慈善冇諗肉唔肉痛。（邊件特別有紀念價值？）冇，我咁鍾意買衫。（捐賭王嘅衫？）咁呢個真係好有意義，所以唔會捐。（叫佢買番你設計畀媽咪嘅頸鏈？）我今晚返去說服吓佢。」
男友冇唔開心
提到最近伍詠薇要跟「友人」割席，有傳此友人正是陳山聰，超雲氣定神閒地稱對事件不作評論，但言語間對男友表示信任：「我唔係藝人，我相信男友知道自己做緊乜，佢Handle到，我唔作評論。」問到是否知道二人反目？她間接承認傳聞：「知道呢件事，冇詳細了解。（山聰有冇唔開心？）冇。（你識唔識伍詠薇？）我未見過佢，喺電視見過。」至於有人以負面字眼作出批評，超雲依然淡定，並得體地說：「每人都有自己一套，我唔係娛樂圈，唔想評論。」表現出大將之風。
文：名人組