林保怡：至少知邊個假意

我做人一向以和為貴，但點都會有人不喜歡你，就當考處事技巧同EQ。我同王喜06年拍旅遊節目《江山美人》，發現與他在工作上有很多不協調，當時要拍一段介紹小龍蝦的片段，王喜認為是殺生，OK！我接受、我認同、我完全贊同，但你不可以控制我們。經過這件事後，我知道跟對方不能再在工作上合作，所以到節目總決賽時我婉拒再做，結果無綫找來夏雨代替我。

不過事隔一段時間，有記者叫我與阿喜合照，我已經feel到大家都冇嘢，影相之嘛，又唔係做嘢，今時今日我見到王喜都會講聲「Hello」。

林保怡與黃德斌（右）及邵美琪私下是好友。

林保怡坦言與王喜在工作上有不協調的地方。

同男人合作冇是非

我不是來搞是非，我想令觀眾留意角色，只想和睦相處，我同陶大宇、歐陽震華合作，天光收工仲會鬥快揸車去食早餐，輸咗請客。吳啟華仲送過套高爾夫球棍畀我，我同男人合作冇是非。

到我拍《金枝慾孽》、《火舞黃沙》一類女人戲，我會當自己係配角，會諗配角咁做會唔會搶咗主角戲？其實我對每個對手都好照顧，邵美琪、鄧萃雯、陳豪、黃德斌拍完戲仍然會聯絡。最近我搵邵美琪，問佢我想將我同佢嘅合照攞畀報紙登，佢話：「梗係得啦，你喎！」

獲戚其義頒細心獎

我覺得做人要真心待人，假情假義冇可能搵到朋友，拍《金枝慾孽》有晚藝員放消夜，幕後就忙鋪雪拍下一場，雖然我背緊對白，幫唔到手鋪雪，但都請班幕後食消夜，監製戚其義後來代表台前幕後頒個「超級細心獎」畀我。我當然試過真心待人，結果被hurt，咁日後咪「Hello」算囉，至少你知邊個真誠、邊個假意！