楊怡凸圍撼長腿Kelly

「東方表行50週年誌慶晚會」前晚於灣仔會展舉行，吸引一班城中名人出席，當中包括楊受成、蔡志明與一對仔女蔡加讚及蔡加怡、名媛李桂蘭、鄭詩韻和夫婿陳鴻業、「鐘錶界美女」胡敏珊等，而陳慧琳（Kelly）、林峯、楊怡、徐子珊及林夏薇等亦有現身，現場星光熠熠，熱鬧非常。

當中Kelly、楊怡及子珊大鬥性感，分別以露腿、露事業線及大露背上陣，已為人母的Kelly以鮮藍色晚裝亮相，表面上看似密實，但原來裙身下半部分開衩，露出雪白的長腿；同是無綫花旦的子珊及楊怡則賣大包，同以貼身裙出席，盡騷弗爆身形，不過子珊今次選擇做「影後」，與楊怡的事業線可謂互相輝映，但論搶鏡度，當然是楊怡較為突出。

Kelly一襲開衩裙子露出修長美腿，密實中帶性感。	鄭詩韻與夫婿陳鴻業恩愛出席。	徐子珊笑言露背都性感，最緊要靚。

自言健康性感

對於近日常走性感路線，楊怡笑謂：「都唔係吖！之前一路拍劇，冇咩機會性感，咁咪趁今日令大家眼前一亮囉，哈哈！成功咗！（係咪留番台慶亮燈時終極性感？）會留番台慶頒獎禮先，其實我自己都係健康性感，冇咩嘢睇，（都有條線！）我隻手都好多線。」談到她是王維基六大挖角目標之一，楊怡笑指對方也有不少目標，但自言會飲水思源，公司亦一直重視她，故暫未有出走的意思。而子珊對於性感度較為遜色，她謂：「對我嚟講都性感，最緊要靚啫！呢排都忙緊之後雲頂登台keep fit。」

蔡志明（左二）與一對子女加讚、加怡，於晚會中與孫秉樞相見歡。

楊受成（左）與東方表行集團主席及創辦人楊明標合照。

做發姣攝影師

至於即將參與賀歲電影《八星抱喜》的Kelly，透露屆時會飾演攝影師，並要色誘古天樂，問到會否擔心接受不來？Kelly笑謂：「我諗要發姣都係搞笑形式，呢排都練緊影相，（蝦餃仔做model？）要蹲低喎！所以都係影花草。」對於李克勤將與now合作當足球主持，Kelly坦言也想亮相其他電視台，更謂等四大唱片問題解決等到頸都長。

文：影視組