Ella助柏豪解桃花劫

官：官恩娜　

周：周柏豪

官恩娜樂意介紹女仔給周柏豪。	周柏豪抗拒女友整容，不排除「退貨」。	Ella與柏豪「盡訴心中情」前搞笑地握手。

談緋聞——處理不當

官：會唔會覺得多啲緋聞會增加知名度？

周：10年前都仲可以，但依家有微博同網上渠道，如果打開報紙只係見你啲緋聞或是非會影響形象，所以要好好平衡自己嘅工作方向，究竟你係好滿足日日見報，定係好腳踏實地照顧到家人或成家立室，我寧願揀冇乜人識。

官：因為形象差，拍唔到廣告搵唔到錢？

周：一來啦，形象差你去到邊都畀人藐視，雖然搵到錢，但長久落去唔健康，就算搵到心愛嘅人成家立室，佢嘅家人都未必明白你，所以又係另外考慮因素。形象事小、聲譽事大！所以之前記者問我，之前嗰件事（跟超雲緋聞）有冇影響形象？我話我唔介意，因為我都冇特登塑造咩陽光男孩、籃球小子，見到唔鍾意嘅嘢就會去表達。

是非破壞形象

官：我明，好似以前緋聞多嘅時候上封面，嗰時竟然有朋友打嚟同我講：你知唔知幾難上到呢個大八卦封面，真係恭喜你！我都唔知好嬲定好笑……學你話齋係影響咗形象，嗰剎那好多人講你，但事業係以慢速向下沉，終有一日講厭你，之後好難洗底。咁你覺唔覺是非多會影響將來認識另一半？

周：如果對方好清晰、好成熟、唔八卦，咁就冇問題，但如果佢真係信啲傳聞就麻煩啲！

官：會唔會啱啱相識而冇機會講晒咁多段戀情畀對方知？

周：所以同對方溝通時，要睇佢介唔介意，如果對方成熟又好愛我，就唔會介意我嘅過去。

相識4年——互相欣賞

官：我喺07年拍電視電影《我是香港人》時認識你，識咗幾年覺得你好正直、對工作好堅持、好有衝勁，唔似同齡男仔咁貪玩同掛住追女仔，幾脫俗，似污泥嗰朵蓮花！

周：嘩，物極必反喎，你讚到我咁冇乜人會信架，不過你講嘅大部分都啱，哈哈。

官：其實初初仲以為你諗嘢好o靚仔，但識落又傾到偈喎！

周：咁你識彈結他、人又靚、唱歌又好聽，成件事都好高分，喺《超級巨聲》之前成日覺得你懷才不遇，但依家好戥你開心。

官：我哋拍《有房出租》時成日傾心事，勸你快啲搵個女友。真係唔明你咁好仔點解唔快啲搵呢？不過你同超雲單緋聞我要幫你澄清吓，報道將成件事扭曲咗，雖然我唔識超雲，但你個人咁正直，唔會搞埋啲古靈精怪嘢囉。不過，其實以你嘅條件可以有好多女友。

周：咁多女朋友好忙架，又要應酬A、應酬B，我又唔識講大話，成日講大話個樣古古怪怪，對眼好想眨、個鼻又想郁，好攰o架！

爆秘戀——分手有因

官：點解唔早啲搵番個人呢？

周：（無奈）冇緣分囉，同埋人哋會覺得我一定有拍拖，所以啲機會就咁冇咗。

官：啲女仔覺得你做呢行唔可以公開，所以較難維持關係？

周：曾經都試過（秘密拍拖），唔係直接影響（分手），但一定係部分原因，又或者我都會避忌，我對工作、家人、朋友好主動，但對感情好被動。

官：啲女仔有冇誤會你又高大又靚仔就實係好花心？

周：咁諗都正常嘅！但我喺中學同做模特兒時好多時畀人無中生有，例如曾經有人同我當時嘅女友「爆料」某晚見到我喺中環拖住第二個，仲上埋的士……但嗰晚我係同女友一齊！成日都有好多是是非非，可能呢啲叫桃花劫！雖然是非都係人緣嘅一種，但要好識得控制，因為會影響形象同心情。

官：我明，我初入行都唔識處理，對自己同人哋影響好大，如果再處理多次一定會好100倍。唔係話要講大話或耍手段，而係講嘢上方式會好大分別。

周：我依家處於你以前個階段，因為我唔識答或怕得罪人，而講一啲答案喺娛樂版上好好寫，結果產生好多誤會。

講整容——愛佢就OK

官：做你女友應該幾開心，因為你會好錫對方又專一！可惜我妹妹就嚟結婚，哈哈！你介唔介意女朋友大過你？我啲朋友通常大我好幾年，我大你五年，咁如果再大過你咪大成十年？你介唔介意另一半大你十年？

周：依家大我十年咪成37歲？好似有少少大，但其實相處溝通到就得。

官：男仔老叫有男人味，但女人老就未必個個有韻味。

周：我覺得老係自然，我唔係好怕我另一半會老，所以接受到年紀相若嘅戀愛或姊弟戀。但整容我接受唔到，最盡係箍牙同割雙眼皮，雖然依家整容好普遍，但我唔希望亦唔認同我另一半咁做。

官：萬一同個女仔開始咗先發現佢「執過」，咁會唔會退貨？

周：呢個問題好難答，因為已經牽涉咗你本身愛上佢，但我信愛可以解決到所有問題，包括整容，但要睇愛嘅程度有幾深，例如愛到結咗婚先知對方整容，咁就要接受；但如果我未結婚，我仲有得揀。

官：如果你好鍾意對方，又覺得對方好靚，但原來發現佢係打針整容，又唔係keep得好耐，跟住啲五官慢慢凹陷，你會唔會叫佢嵌番？

周：真係要睇吓有幾愛對方，如果愛到當對方係屋企人，就唔介意對方係點樣！如果嗰種愛未去到親人關係，好多嘢可以退貨架嘛，除非一識對方就話我知佢個鼻係假嘅，咁我反而會加分添！

攝影：吳文聰

記者：倪小珊

髮型：Eve Chiu

場地：千鶴日本料理@都會海逸酒店