偉仔戴特製con 電眼買保險

憑迷人電眼電暈萬千女生的梁朝偉,接拍新戲戴上特製隱形鏡(con),化身視障人士與周迅同場「惡鬥」,再次挑戰演技!電影公司以防萬一,為偉仔的電眼購買保險。

偉仔拍竣《一代宗師》後,隨即轉飛上海,為麥兆輝及莊文強執導新片《聽風者》試造型,及準備數天後正式投入拍攝工作。據悉,今次偉仔扮演生於五十年代的特務間諜,因視障關係擁有靈敏聽覺及特異功能,與女主角周迅關係錯綜複雜。

做手術重見光明

偉仔日前試造型時,與麥兆輝研究眼部定妝,他二話不說接受提議,將佩戴白色特製隱形鏡上陣,令麥兆輝相當感動謂:「佢未戴過隱形眼鏡,都預咗會戴得辛苦。死啦,佢以電眼見稱,如果有乜閃失我都唔知點算。戲中佢仲有場做手術嘅戲,令佢重見光明,依家仲研究緊點拍。(幫佢買保險?)呢方面電影公司會搞。」

麥兆輝坦言年前欣賞過英皇電影發行的《風聲》後,對此類特務片種十分有興趣,剛巧今次有電影公司買下《風》片小說作家麥家另一本著作《解密》的 版權,找他來洽談合作,可謂因利乘便。除偉仔及周迅外,憑電視劇《將愛情進行到底》而竄紅的內地演員王學兵亦會加盟,初定聖誕前拍竣。

文:影視組