糖妹甩宅男女神騷哥利
糖妹（黃山怡）因「宅男女神」美譽而人氣急升，但小妮子欲搣甩這「花瓶」之名做實力派歌手。至於RubberBand的泥鯭，其右腳因長期打鼓，導致肌肉勞損，稍後要負傷開騷。
組合糖兄妹、樂隊RubberBand及Zen等，將於10月25日假九展舉行《插電演唱會之香港壓軸場》，資歷最淺的糖妹，對於屆時要和一眾前輩級音樂人大鬥歌藝，坦言有壓力。有謂糖妹是唯一女將，兼且年輕、樣甜，必是全場焦點，但糖妹卻說：「其實我唔鍾意『宅男女神』個名，我想借今次個騷，表現出自己實力一面，我要搣甩呢個名，我唔想做花瓶。」她又謙說自己不美，有更多女歌手比她更美更長腿。
泥鯭膝有硬塊
糖妹說為備戰今次壓軸場演唱會，一定會加緊練歌，但早前發現喉嚨出現生繭問題，故現時要小心用聲，她稱：「我諗我係用錯方法唱歌，所以要重新學唱歌，幸好生繭嘅問題不大，我諗呢個問題好多歌手都有。」
RubberBand的泥鯭亦說有「職業病」，他最近發現右腳膝蓋出現硬塊，除感痛楚外，不能伸展自如，據醫生稱可能是他長期踩鼓的腳踏致肌肉勞損，如情況再惡化，可能要做手術。問他可會影響今次演出？泥鯭有信心說：「唔會，有都頂硬上，因為今次係大騷。」
自嘲似uncle
RubberBand又說期待和糖兄妹及Zen同場演出，他們笑言：「對住糖妹，我哋覺得自己似uncle，佢哋好fresh，尤其糖妹，佢個樣同聲都好似陳慧嫻。」隨即大唱陳慧嫻的金曲《飄雪》：「又見雪飄過……」
採訪：音樂組
服裝：Sport b.
髮型：Mad Ho@IL Colpo TST（RubberBand） Green@Chin G（糖兄妹）