陳國峰接棒有壓力

無綫《超級巨聲》已舉行第三屆，而二幫成員中有不少出色分子，除隊長陳國峰被無綫力谷做崔建邦接班人外，其他成員謝東閔、羅孝勇、吳業坤和胡鴻鈞亦個個高大威猛，既有機會出唱片，亦有拍劇、做主持，吸納了一班固定的粉絲。

剛成為第二代「萬靈哥哥」的陳國峰，雖然是眾兄弟中年紀最大，但機會亦較其他人多，早前便有機會主持《勁歌金曲》季選，據知稍後更要擔起《勁歌》救亡工作，與糖妹一齊做主持，他說：「唔敢同崔建邦比較，自己一定追唔上，雖然做大型節目主持壓力好大，但自己會盡力做到最好。」

巨聲二幫成員各具優點，是無綫力捧新星。

坤哥獲經理人鼓勵，指他適合拍處境劇。

謝東閔演上癮

先後與林欣彤傳過緋聞的謝東閔、羅孝勇和胡鴻鈞最近亦各有發展，謝東閔主攻拍劇集，羅孝勇做節目主持，胡鴻鈞早前更獲唱片公司簽約做歌手。謝東閔說：「最近同黎耀祥、馬國明、楊怡等好戲之人合作過，從佢哋身上學到好多嘢，原本擔心做得唔好，點知愈演愈上癮，希望可以喺演戲方面發展。」羅孝勇表示：「我喺澳洲返嚟，廣東話唔係太好，做主持可以幫助學好廣東話，依家仲有作曲，希望遲啲有機會出碟。」而胡鴻鈞希望以歌聲吸引樂迷，他說：「會唱慢歌為主，能夠簽唱片公司，都覺得好幸運。」

坤哥有觀眾緣

傻氣十足的「坤哥」吳業坤坦言發展未及其他成員，仍在摸索階段，他說：「依家有做啲主持工作，但覺得發展好似差過其他人，有諗過係咪自己問題，經理人畀咗好多鼓勵我，覺得我有觀眾緣，所以將來可以拍處境劇。」

攝：秦健輝

服裝、場地：TWIST @ 中環

文：專案組