李蕙敏謀會佐治古尼望門興嘆
歌手李蕙敏早前獲男友陪歐遊預祝下月生日，暢遊意大利Como湖畔，路過荷里活型男佐治古尼寓所外，她笑言對方當時正身在威尼斯出席影展，搞到兩人緣慳一面！
李蕙敏（Amanda）早前與外籍男友歐遊，順道預祝她十月生辰，她說：「仲有其他朋友一齊，但我要去內地登台，所以玩咗一星期走先，男友留低睇F1賽車。」她還笑說：「最初五天在意大利名勝Como湖畔，曾路經荷里活影星佐治古尼寓所，可惜佢去咗威尼斯，緣慳一面。」之後再開車到米蘭遊玩，她透露此行主攻買牛仔褲及到二手店訪尋有趣飾物，還有參觀大教堂。
的士司機踢爆身份
原來Amanda與男友拍拖初時，對方並不知道她的歌手身份，結果竟由的士司機踢爆。她說：「有日佢送我返屋企，我落的士後司機問佢係咪Amanda男友？他好奇的士司機點解認識我，於是上網查，才知道我出唱片，係流行曲歌手，佢好驚喜。不過佢唔識中文，好少聽我嘅歌。」
Amanda坦言被男友樂天性格影響，拍拖後變得開朗。對於早前被傳財困，她說：「梗係嬲啦！除咗之前中秋登台，我啱啱簽咗合約聖誕去芝加哥等幾個地方做騷，工作量穩定，只係無咁活躍。其實做騷、開店好忙，而且媽咪年紀大，我想畀多啲時間陪佢。」
文：盧旦