含冤屈病 擬定遺書 陳法蓉：想以死還清白
陳法蓉外表堅強，但也有脆弱的時候，曾有一次不開心令她萌生自殺念頭，還在心中擬定遺書，不過最終她都能以積極態度，幫自己走出陰霾。
我係曾經有過自殺念頭，諗埋遺書點寫，「你想我死」，係想以死還自己一個清白，當時係畀啲不負責任嘅傳媒寫不正確嘅報道，令到我情緒低落、抑鬱，但好彩得到身邊人嘅鼓勵，之後我都用積極嘅態度走出陰霾，去讀心理衞生急救課程，令我更明白情緒低落時應該點樣處理，我要將自己嘅親身經歷，對呢方面嘅了解，去幫助、輔助有情緒病嘅人，用番積極嘅態度面對生活困難，我依家慶幸自己冇行到自殺嗰一步。
行善回饋社會
做咁多年工作，依家嘅我覺得喺社會上攞咗好多，好想做多啲慈善嘢，而且曾經有段時間身體唔好，幾年前拍劇捱壞身體，試過一年拍咗一百集劇集，搞到胃液倒流，初時仲以為係水土不服，因為返到香港又冇事，後來喺香港徹底檢查至知情況嚴重，而且會隨時發作，所以長篇劇唔適合我拍。
希望再拍劇集
感激天父，之後不斷有單元劇、電影、廣告、活動都冇停過，最近身體檢查過，如果許可，都想拍番多啲劇，因為我鍾意演戲，會揀自己鍾意嘅嘢做，如果有適合劇本、好對手、鍾意嘅故事就會拍，唔會做勉強自己嘅嘢。（完）
後記：克己待人寧受委屈
跟法蓉做專訪之前，都會像一般人一樣，以為她很剛強，但經深入了解，發覺其實她是個極度需要愛的善良女人，寧願自己受委屈，也堅持要顧及別人感受，幸福，最終會落在善良的人身上，相信法蓉成為幸福的女人指日可待。
口述：陳法蓉
筆錄：影視組