Jeana寸得起下一站大陸
o靚模Jeana（何佩瑜）集言論惹火、疑似整容、被指年齡報細數等爭議話題於一身，登上2011年上半年度o靚模搜尋榜冠軍，更巧合地應了黃子華棟篤笑《嘩眾取寵》中《七步成詩》的讖文，證明夠代表性才寸得起！
Jeana由冇人叫得出名，到砌低死敵Phoebe（許穎）、黃榕，跑贏Angelababy、周秀娜，成搜尋榜冠軍，更應了子華口中的讖文：「我係最o靚嘅o靚模，你知我乜嘢cup數，但係o靚得三個月，有人叫我做伯母。」前後只半年，但Jeana對封冠並不在乎。
自認內外都掂
Jeana說：「我唔係贏人，佢哋都唔係我目標，攞搜尋榜冠軍亦唔係紅，我只係得到想要嘅嘢，嚟緊會做更多複雜嘢，我要喺北京住嘅嫲嫲都知我工作消息，將知名度打入內地。（性感唔驚長輩不滿？）我係佢哋寶貝孫女，解釋下就OK，我只係唔想冇經歷，到老時冇回憶。我來自北京，普通話對我冇難度，我夠高，樣又古典，外在、內在都有信心。」
拒絕做「偽人」
別的o靚模這樣說，可以當她吹水，自度寸嘴形象上位的Jeana，真正實踐了美國普普藝術大師安迪華荷名句：「每人都有十五分鐘成名時間。」她說：「接觸過太多形象健康，後台兩回事嘅artist，我唔想做偽人。（你喺微博完全唔寸，扭曲自己算唔算偽？）寸係劇情需要，我知寸緊邊個，唔會寸唔關事嘅、唔會寸前輩。（唔嬲被寸報細歲數？）真係唔知話我31歲嘅風邊度嚟，當炒作囉，唔mind，我只mind人話我工作做得唔好。（寸你嗰班o靚模都學你去打碟，點睇？）我哋公司好多嘢都畀人follow，但淨係識跟冇用，要創新，唔係就冇存在價值。」
文：陳奕龍
攝影：黃叔榮
服裝及場地：POMPEI
指甲修飾：O'tsu'me
御甲Minx Nail