鄧穎芝SM造型回歸18禁
歌手鄧穎芝（Van仔）闊別樂壇三年，回歸首支主打新歌MV意識大膽，肉色歌衫似足SM冇着look，被視頻網頁評為「18禁」、意識不良！而這次豪花60萬自資出碟的Van仔被嘲難以回本，但是數口精的她其實早已計好度好！
鄧穎芝將於9月初推出最新大碟，她特別為第一首主打歌《變臉》度了一個意識非常大膽的MV，誓要「先聲奪人、引人注意」！而她在MV中的一身肉色衣服與性感十足的舞蹈，原來靈感來自她非常欣賞的Lady GaGa，她說：「香港冇一個好似佢咁大膽、誇張、忘我嘅藝人，所以我覺得不妨一試！」
用50個舞蹈員
雖然此MV已經在電視上面世，可是卻被YouTube「河蟹」，評定為禁止未夠18歲人士收看，就算閣下已足18，也要經過煩瑣的登記與登入程序，才可以收看，令Van仔原定的宣傳計劃受阻！她說：「有唔開心，不過唔算打亂算盤，因為隻碟仲有好多其他歌值得欣賞，好似《Boom Bomb》，呢首歌用咗50個dancers，都好重本！」
望提高知名度
而全隻大碟製作費皆由Van仔自己籌集，共花60萬重本，故被網友傳她是「有錢女」、「靠屋企」，但是她說：「全部都係我辛辛苦苦嘅血汗錢！我呢三年不停去內地出騷，每次都有5位數字！咁多都係慢慢儲番嚟！」她坦言這次出碟冇諗過賺錢，不過卻視為一次「大型宣傳活動」，使自己在香港、亞洲知名度提高，再以登台形式「搵真銀」回本！她這次出碟雖似鹵莽，但其實所有東西Van仔都計好度好，早有遠見！
文：高橋康 攝：林蔚恩